АҚШ собиқ президенти Билл Клинтон 2011 йилдан бери БАА таълим тармоқларидан бирининг хайрия жамғармасига раҳбарлик қилгани учун 5,5 миллион доллардан кўпроқ пул олган. Бу ҳақда «РИА Новости» хабар бермоқда.
1993—2001 йилларда АҚШга президентлик қилган Клинтон 2010 йили GEMS Education мактаблар тармоғидан Varkey GEMS Foundation хайрия ташкилотининг фахрий раиси бўлиш таклифини олган.
Собиқ президентнинг турмуш ўртоғи, ўз вақтида АҚШ давлат котиби сифатида фаолият олиб борган Ҳиллари Клинтон томонидан эълон қилинган солиқ декларациясига мувофиқ, 2011 йилдан бери жаноб Клинтон GEMS Education’дан 5,625 миллион доллар олган.
Мазкур маълумотлар Ҳиллари Клинтоннинг президент сайлови бўйича сайловолди ташвиқоти доирасида эълон қилинди. Клинтонга 2011 йили 500 минг, 2012 йили 1,25 миллион, 2013 йили 1,75 миллион, 2014 йили эса 2,125 миллион доллар тўланган. 2015 йилги маълумотлар келтирилмаган. Бундан ташқари, собиқ президент 2013 йил апрелида Абу-Дабида ташкил этилган сайёҳлик форумидаги нутқи учун 500 минг доллар олган.
Varkey GEMS Foundation жамғармаси бир вақтнинг ўзида бир неча сиёсий арбоблар билан, хусусан, Буюк Британия собиқ бош вазири Тони Блэр билан ҳам иш олиб боради. Жамғарманинг асосий мақсади — таълим тарғиботи ва эҳтиёжманд болаларга ёрдам кўрсатиш.
Билл Клинтонга тўланган пуллар ҳақидаги ахборот юзасидан изоҳ беришдан бош тортган GEMS таълим тармоғи Дубайда жойлашган бўлиб, Яқин Шарқ, Шимолий Америка, Европа, Осиё ва Африканинг 19 мамлакатидаги 50 мактабни бошқаради.
Изоҳ (0)