«Жамият» газетаси «Кексаларимиз – бебаҳо бойлигимиз» деб номланган ижодий танлов эълон қилди
Олий Мажлис ҳузуридаги Нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди давлат ижтимоий буюртмаларини жойлаштириш бўйича 2015 йилда илк бор танлов ўтказди. Мазкур танловда «Жамият» ижтимоий-сиёсий газетаси таҳририяти «Кексаларимиз — бебаҳо бойлигимиз» лойиҳаси билан иштирок этди ва бу лойиҳа давлат ижтимоий буюртмаси сифатида молиялаштирилди.
Айни пайтда газета таҳририяти Ўзбекистон Матбуот ва ахборот агентлиги билан ижтимоий шериклик асосида давлат ижтимоий буюртмасини бажаришни бошлади. Шу муносабат билан «Жамият» газетаси 2015 йил 28 июль куни «Кексаларимиз — бебаҳо бойлигимиз» лойиҳасининг тақдимотига бағишланган матбуот анжуманини ўтказди.
Унда Олий Мажлис ҳузуридаги Нодавлат нотижорат ташкилотларини қўллаб-қувватлаш жамоат фонди маблағларини бошқариш бўйича Парламент комиссияси аъзолари, Ўзбекистон Матбуот ва ахборот агентлиги, Фуқаролик жамияти шаклланишини мониторинг қилиш мустақил институти, Ўзбекистон Нодавлат нотижорат ташкилотлари миллий ассоциацияси, нодавлат нотижорат ташкилотлар, газета муассислари вакиллари, оммавий ахборот воситалари, шу жумладан «Дарё» нашри ҳам иштирок этди.
Анжуманда давлат буюртмаси сифатида молиялаштирилган ижтимоий лойиҳанинг мақсад-вазифалари, амалга ошириш механизмлари, ундан кутилаётган натижалар ҳақида батафсил сўз юритилди.
«Кексаларни эъзозлаш йили» Давлат дастури ижроси доирасида Ўзбекистонда олиб борилаётган ишларни кенг ёритиш мақсадида газета саҳифаларида «Кексаларимиз — бебаҳо бойлигимиз» деб номланган махсус саҳифа ташкил этилди.
Газета таҳририяти «Кексаларимиз — бебаҳо бойлигимиз» деб номланган ижодий танлов ҳам эълон қилди. Лойиҳанинг амалга ошириш муддати бир йил бўлиб, танлов ғолиблари 2016 йил 27 июнь — Матбуот ва оммавий ахборот воситалари ходимлари куни арафасида эълон қилинади.
Лойиҳа доирасида шунингдек, Иккинчи жаҳон уруши қатнашчилари, фронт орти меҳнат фахрийлари, нафақадаги журналистлар ва бошқа нуронийларнинг Республика бўйича 800 нафарини «Жамият» ижтимоий-сиёсий газетасига бепул обуна қилиш назарда тутилган.
