Актёр Том Круз Top Gun фильмининг сиквелида фақат бир шарт билан — фильмда ҳақиқий қирувчи самолётлардан фойдаланилсагина, суратга тушишга рози. Бу ҳақда The Guardian нашри хабар бермоқда.
«Бу жуда яхши ғоя. Мен яна бир бор қирувчи самолётда учишдан хурсанд бўлардим, фақат бир шарт билан — бу ҳақиқий қирувчи самолёт бўлиши керак. Компьютерда чизилган самолётлар бўлмаслиги керак. Агар ҳаммаси ўхшаса ва АҚШ Мудофаа вазирлиги бизга самолётлар ва рухсат берса, жуда зўр бўлади», — деди Круз.
Аввалроқ Top Gun фильмининг давоми суратга олиниши ҳақида продюсер Дэвид Эллисон маълум қилганди. Фильм сценарийси Жастин Маркс томонидан ёзилмоқда. Нашр маълумотларига кўра, фильмда 2011 йили авиация капитани унвонини олган Буюк Британия шаҳзодаси Гарри суратга тушиши мумкин.
Биринчи Top Gun 1986 йилда экранларга чиққан. Круз ўша фильмда АҚШ Ҳарбий-ҳаво кучларининг Мэверик исмли курсанти ролини ўйнаган. 15 миллион доллар эвазига тасвирга олинган фильм жаҳон прокатида 350 миллион доллар ишлаб топган.
Изоҳ (0)