БМТнинг Бутунжаҳон озиқ-овқат дастури (БООД) Яманда ҳарбий ҳаракатлар бошлангандан бери биринчи марта катта миқдордаги озиқ-овқат маҳсулотларини мамлакат жанубидаги Адан порт шаҳрига етказиб берди. Тарқатилган пресс-релиздан маълум бўлишича, кемадаги озуқа бир ой давомида 180 минг кишини тўйдиришга етади. Бу ҳақда «ТАСС» хабар берди.
Келтирилган гуманитар ёрдам ҳукумат тарафдорлари ва шиа исёнчилари ўртасида қақшатқич жанглар кетаётган жанубий провинциялар аҳолиси ўртасида тақсимланади. Таъкидланишича, кема Яман соҳилларига 26 июнда етиб келган, бироқ хавфсиз қўним топиш ва юкларни бўшатиш учун салкам бир ой кутилган.
Маълумотларга кўра, бугунги кунда мамлакатнинг салкам 13 миллион фуқароси озиқ-овқат етишмовчилигини ҳис этмоқда, улардан 6 миллион нафари ўзини таъминлай олмайди ва ташқи ёрдамга муҳтож. Давом этаётган жанговар ҳаракатлар ва молиялаштиришдаги қийинчиликларга қарамай, апрель ойидан бери БООД Яманнинг 13 провинциясидаги 2 миллиондан зиёд аҳолига ёрдам кўрсатишга муваффақ бўлган.
Изоҳ (0)