2015 йилнинг 15 июль куни Ўзбекистон Республикаси Ташқи ишлар вазирлигида Ўзбекистонда ўз миссиясини якунлаётган Швеция Қироллигининг Фавқулодда ва Мухтор Элчиси (қароргоҳи Стокгольм шаҳрида) Аке Петерсон билан учрашув бўлиб ўтди. Бу ҳақда Ўзбекистон ТИВ матбуот хизмати хабар бермоқда.
Суҳбат чоғида икки томон кун тартибидаги масалалар, турли соҳалардаги ҳамкорликнинг, жумладан «Ўзбекистон – Европа Иттифоқи» шаклидаги, БМТ, ЕХҲТ ва бошқа ташкилотлар доирасидаги алоқаларни янада ривожлантириш истиқболлари ҳамда баъзи халқаро ва минтақавий муаммолар юзасидан фикр алмашилди.
Мулоқот давомида муносабатларни институтлаштириш ва унга тизимли тус бериш, Ўзбекистон ва Швеция ишбилармон доиралари бевосита алоқалари иштирокчилари таркибини кенгайтириш, маданий-гуманитар соҳадаги алоқаларни фаоллаштиришдан икки томон ҳам манфаатдор эканлиги таъкидланди.
Учрашувда элчининг Ўзбекистон—Швеция мулоқоти ривожига қўшган шахсий ҳиссаси таъкидлаб ўтилди.
Ўз навбатида Аке Петерсон Ўзбекистондаги дипломатик миссиясида кўрсатилган кўмак учун ўзининг самимий миннатдорчилигини изҳор этди.
Изоҳ (0)