2015 йил ёз фаслининг чилласига келиб, Ўзбекистонда ҳаво ҳарорати анча кўтарилиб кетди. Фавқулодда вазиятлар вазирлиги жазирамадан хавотирланишга ўрин йўқлиги ҳақида огоҳлантирди.
«Жорий йилнинг 12 июль кунидан республикамиз ҳудудида Туркманистон орқали Эрон давлати ҳудудларидан иссиқ ҳаво оқими кириб келмоқда. Иссиқ ҳаво оқимининг кириб келиши шу ҳафта давомида кузатилади.
Кундузи ҳаво ҳарорати кўп йиллик кўрсаткичлардан 5—6 даража юқори бўлиши, яъни 42—44 даража иссиқ бўлиши кузатилади.
Бундай иссиқ ҳавонинг кузатилиши юртимиз иқлими учун истисно эмас, балки қисқа муддатли бу каби исиш ҳолатлари ҳар йили кузатилади.
Нисбатан узоқ муддатда ҳавонинг исиши камроқ кузатилади. Мисол учун, охирги 10 йилни оладиган бўлсак, июль ойининг охири август ойининг бошларида, яъни 2013, 2011, 2008 йилларда ҳавонинг нисбатан исиши кузатилган. Бу ҳолат 5—7 кунгача давом этганлиги, ҳаво ҳарорати эса 40—45 даражагача кўтарилганлиги қайд этилган.
Бундай даврларда офтоб уруши, овқатдан заҳарланиш, ёнғин содир бўлиши эҳтимоли кўпаяди.
Фавқулодда вазиятлар вазирлиги томонидан ҳаво ҳарорати кўтарилиши билан боғлиқ фавқулодда вазиятларнинг олдини олиш мақсадида алоқа компаниялари орқали барча абонентларга SMS хабарлар жўнатилди. Бу жараён, аввало, профилактик характерга эга бўлиб, биринчи навбатда аҳоли томонидан зарурий эҳтиёт чораларини кўришлари ва огоҳ бўлишлари мақсадида амалга оширилади.
Бундан ташқари, ФВВ мутахассислари томонидан тегишли вазирлик ва идоралар билан ҳамкорликда маҳаллаларда, болаларни соғломлаштириш оромгоҳларида, фуқароларнинг оммавий дам олишлари учун мўлжалланган сув ҳавзаларида, оммавий овқатланиш ва савдо жойларида, куннинг иссиқ вақтларида тўғри ҳаракат қилиш бўйича тушунтириш ишлари олиб борилмоқда.
Мутахассисларининг фикрича, бундай иссиқ ҳаво Ўзбекистон иқилими учун хос бўлиб, оддий эҳтиёткорлик чоралари кўрилганда соғлиққа зарар етказиш борасида хавотирга ўрин бўлмайди», — дейилади ФВВ матбуот хизмати хабарида.
Иссиқ вақтларда қандай ҳаракат қилиш йўлларини билишни истасангиз, ФВВ сайтидаги «Фавқулодда вазият: унда қандай ҳаракат қилиш керак» рукнидаги «Жазирама иссиқда қандай ҳаракат қилиш керак» мавзусида тегишли маълумотлар билан танишишингиз мумкин.
Изоҳ (0)