Тошкент шаҳар ҳокими Р.Усмонов раислигида ўтказилган халқ депутатлари Тошкент шаҳар Кенгашининг олтинчи сессиясида тўй-ҳашамлар, оилавий тантаналар, маърака ва маросимларнинг ўтказилишини тартибга солиш масалалари кўриб чиқилди. Бу ҳақда «Тошкент оқшоми» газетасига таяниб, «Gazeta.uz» хабар бермоқда.
Кенгаш томонидан тўй ва маросим эгаларига тадбирни ихчам, камхарж ва дабдабасиз ўтказиш бўйича тушунтириш ишларини олиб бориш ҳамда жамоатчилик фикрини инобатга олмайдиган фуқароларни маҳалла фуқаролар йиғинида муҳокама қилиш тавсия этилди.
Аҳоли тинчлигига халал етказмаслик мақсадида тўй, маросим ва оилавий тадбирлар муносабати билан ресторанлар, кафелар, тўйхоналар, гузарлар, хусусий хонадонлар ва кўчаларда соат 23:00 дан 06:00 гача баланд овоз билан қўшиқ айтиш, мусиқа чалиш, товуш сигналларини бериш, овоз чиқарувчи техника воситаларидан фойдаланиш ва шовқин қилиш мумкин эмаслиги белгилаб қўйилганлиги таъкидланди.
Бундан ташқари, тўй-ҳашам муносабати билан келин-куёв ва уларнинг яқинлари шаҳар айланишида йўл ҳаракати хавфсизлигига қатъий риоя этилишининг назоратга олиниши тавсия қилинди.
Изоҳ (0)