Бугун, 6 июль куни ўзбекистонлик зиёратчиларнинг дастлабки 168 нафардан иборат гуруҳи «Ўзбекистон ҳаво йўллари» МАКнинг замонавий авиалайнерида Саудия Арабистонига Рамазон мавсумида умра амалларини бажариш учун учиб кетди, деб хабар қилади Дин ишлари бўйича қўмита расмий сайти.
Рамазон мавсумида 670 нафар зиёратчиларни умра сафарига юбориш режалаштирилган.
Сафарга чиқишдан олдин барча зиёратчилар марказлашган тиббий пунктларда мененгит ва гриппга қарши зардоб билан эмланди. Саудия Арабистонида ҳаво ҳароратининг юқори даражада бўлишини инобатга олиб, шифокорлар гуруҳи томонидан зиёратчиларнинг саломатлигини сақлаш мақсадида эслатма ва тавсиялар ишлаб чиқилиб, тегишли тушунтириш ишлари олиб борилди.
Рамазон мавсумида зиёрат 10 кунни ташкил этади. Зиёратчилар Мадина шаҳрида 3 кун, Маккада эса 7 кун бўлади. Зиёратчиларга мавсум давомида ўзбекистонлик 2 нафар ишчи гуруҳи, 3 нафар шифокор ва 2 нафар ошпаз хизмат кўрсатади.
Ўзбекистонлик зиёратчилар истиқомат қилишлари учун Мадина шаҳрида «Масжиди набавий»дан 100—150 метр масофада жойлашган тўрт юлдузли «Фейрузатул Хайр» меҳмонхонаси, Макка шаҳрида эса «Харам масжиди»дан 1500—2000 метр узоқликдаги «Совфатал Мияъд» меҳмонхонаси тайёрлаб қўйилган.
Меҳмонхоналарда зиёратчиларнинг саҳарлик ва ифторлик қилишлари учун ошхона ҳамда уларнинг соғлиқларини доимий назорат қилиш мақсадида минишифохоналар фаолияти ташкил этилган.
Шунингдек, зиёратчилар учун меҳмонхоналарда сунъий йўлдош орқали Ўзбекистон телевиденияси дастурларини томоша қилиш имкониятлари яратилган.
Зиёратчиларни Саудия Арабистонида кутиб олиш, кузатиш ва уларга қулай шарт-шароитлар яратиш ишлари Дин ишлари бўйича қўмита ва Ўзбекистон мусулмонлари идораси ишчи гуруҳи томонидан «Ҳаж» ва «Умра» масалалари бўйича атташе ҳамкорлигида ташкил этилади.
Изоҳ (0)