Япония кейинги уч йил давомида Меконг дарёси ҳавзасидаги мамлакатлар – Вьетнам, Камбожа, Лаос, Мьянма, Таиландга 750 миллиард иена (қарийб 6,1 миллиард доллар) миқдорида иқтисодий ёрдам кўрсатади. Бу ҳақда, «ТАСС» хабарига кўра, Япония бош вазири Синдзо Абэ «Япония – Меконг» саммити вақтида маълум қилди.
Япония ва Меконг ҳавзасидаги мамлакатларнинг раҳбарлари уч йилга мўлжалланган ривожланиш дастурини тасдиқлашди, унда, жумладан, минтақа «глобал ривожланиш маркази»га айланиши мумкинлиги қайд этилган. «Сув ва қуруқликдаги транспорт йўллари учун стратегик нуқта ҳисобланган Меконг минтақасидаги тинчлик ва барқарорлик Япония учун жуда ҳам муҳим аҳамиятга эга», - деди Япония бош вазири Абэ.
Токиодаги учрашувда Мьянма президенти Тейн Сейн, Камбожа бош вазири Хун Сен, Лаос бош вазири Тхонгсинг Тхаммавонг, Таиланд бош вазири Прают Чан-Оча ва Вьетнам бош вазири Нгуен Тан Зунг иштирок этди. Мазкур беш мамлакат Жануби-Шарқий Осиё мамлакатлари уюшмаси (АСЕАН)га ҳам аъзо ҳисобланади.
Меконг дарёси ҳавзаси Осиёнинг 300 миллион аҳоли истиқомат қиладиган энг тез ривожланаётган ҳудудларидан бири ҳисобланади. Дарё ҳавзаси беш мамлакат – Вьетнам, Камбожа, Лаос, Мьянма ва Таиландни, шунингдек, қисман Хитойнинг Юньнань вилоятини ўз ичига олади.
Изоҳ (0)