Автомобиль ишлаб чиқариш ҳажми бўйича Япониянинг тўртинчи энг йирик ширкати ҳисобланган Suzuki Motor’нинг раҳбари, 85 ёшли Осаму Судзуки ўз ўғли – Тосихиро Судзукини корпорациянинг янги президенти деб атади. Бу ҳақда RBC.ru хабар бермоқда.
56 ёшли Тосихиро Судзуки 1994 йилдан бери Suzuki’да ишлайди, 2011 йили эса корпорациянинг тўрт ижрочи вице-президентидан бирига айланган эди.
Аввалроқ Suzuki раҳбари ўзининг меросхўри сифатида куёви Хиротаку Онони танламоқчи эди, бироқ у 2007 йили саратондан вафот этди.
Осаму Судзуки раҳбарлигида Suzuki Япониянинг энг йирик оилавий корпорацияларидан бирига айланди. Компания президенти ўзгариши ҳақидаги хабарлар таъсирида Suzuki акциялари 5,5 фоизга қимматлашди.
Акциялар бозори ёпилганидан сўнг, Suzuki янги молиявий мақсадларини, хусусан, 2020 йилга бориб йилига 3,4 миллион дона автомобиль ишлаб чиқармоқчи эканлигини маълум қилди.
Изоҳ (0)