Америкалик боксчи Флойд Мэйуэзер Швецияда ишлаб чиқарилган Koenigsegg CCXR Trevita суперкарини сотиб олди. TMZ Sports маълумотларига кўра, мазкур харид учун спортчи 4,8 миллион доллар тўлади.
Ушбу модель кузови ялтировчи олмос билан қопланган оқ углерод толаларидан тайёрланган. Trevita атиги уч нусхада тайёрланган бўлиб, вазнининг енгиллиги (1280 килограмм), этанол ва бензин қоришмасида ҳаракатлана олиши, 2,9 сонияда 100 километр тезликка эриша олиши ва энг юқори тезлиги соатига 402 километрга тенг эканлиги билан ажралиб туради.
Мэйуэзер – қимматбаҳо ва камёб автомобиллар ихлосманди. Унинг гаражида умумий қиймати 6,2 миллион доллар бўлган учта Bugatti спорткари, Ferrari Enzo, Rolls-Royce Wraith ва Phantom, Bentley Continental Flying Spur, шунингдек, Mercedes-Benz’нинг қатор моделларини учратиш мумкин. Пул ва қимматбаҳо буюмларга ўчлиги ортидан у The Money («Пул») деган лақаб орттирган.
Америкалик бу боксчи даврнинг энг кўп пул топадиган спортчиси ҳисобланади. Forbes талқинига кўра, 2014 йилнинг июнидан 2015 йил июнига қадар Мэйуэзер 300 миллион доллар ишлаб топган.
Изоҳ (0)