Audi компанияси Part-Time Scientists муҳандислар гуруҳи билан бирга Audi lunar quattro номини олган луноход ишлаб чиқди. Motor.ru’нинг хабар беришича, қурилма 2017 йилда Ернинг табиий йўлдошига учирилиши режалаштирилган.
Амалда тўлиқ алюминийдан ташкил топган конструкция мунтазам тўлиқ узатма, тўрт электромотор, литий-ионли аккумляторлар блоки, батареяларни қувватлантириш учун зарур бўлган ҳаракатланувчи қуёш панели ва иккита стереоскопик камера билан таъминланган.
Бундан ташқари, ровер илмий тасвирга олиш ускунаси билан ҳам таъминланган. Ҳисоб-китоблар бўйича, луноход соатига 3,6 километр тезликда ҳаракатланади. Қурилма Австрия Альпларида ва Атлантика океанидаги Тенерифе оролида Ойга яқин шароитларда синовдан ўтказилган.
Луноход 2017 йили – инсон охирги марта Ойга қадам қўйганидан кейин 45 йил ўтиб учирилади. 380 минг километр йўл босган қурилма 1972 йили «Апполлон-17» экипажи қўнган жойга тушишга ҳаракат қилади. Ровер Ой сатҳида беш кун давомида ҳаракатда бўлади.
Қурилма ишлаб чиқувчилари Google’нинг Lunar X Prize соврини учун курашишни режалаштиришмоқда. Совринга эгалик қилиш ниятида бўлган муҳандислар Ойга енгил қўниб, унинг сатҳида камида 500 метр ҳаракатлана оладиган ва Ерга юқори аниқликдаги фото- ва видеоматериалларни жўнатиши керак. Совриннинг мукофот жамғармаси 30 миллион долларга тенг.
Изоҳ (0)