Пуэрто-Рико ўзининг 72 миллиард доллар атрофидаги давлат қарзини буткул тўлашга қодир эмас. Бу ҳақда орол губернатори Алехандро Гарсиа Падилья New York Times газетасига берган интервьюсида маълум қилди, дея хабар бермоқда «ТАСС».
Нашрнинг маълум қилишича, ушбу орол-давлат губернатори ва маъмурияти аъзолари ўзларининг кўпсонли қарз берувчиларидан енгиллик беришни сўрамоқчи: бу айрим қарздорликлар бўйича тўловларни 5 йил кейинга суриш ёки жорий тўловлар дастурини муайян муддатга узайтиришни назарда тутади.
«Қарз тўлашнинг имкони йўқ, — дея баён қилди губернатор газетага. — Бошқа иложимиз йўқ. Бу энди сиёсат эмас, оддий математика».
Шу йил апрелида Пуэрто-Рико ривожланиш ҳукумат банки молиялаштириш етарлича бўлмагани учун яқин уч ой мобайнида оролдаги давлат муассасалари ёпилиши мумкинлиги ҳақида эълон қилган эди. Шундан сўнг аксар маҳаллий қонун чиқарувчилар давлатнинг 9,8 миллиардлик бюджетини 674 миллион долларга камайтириш ташаббуси билан чиқди. Бу шундай ҳам қашшоқлик ва жиноятчиликнинг юқори даражасига эга мамлакатдаги маош, пенсия ҳамда нафақаларнинг қисқариши, фуқаролар учун солиқларнинг оширилишини англатади.
Изоҳ (0)