Тошкент шаҳридаги Инҳа университетида «Очиқ эшиклар куни» ўтказилди

Ишлаб чиқаришни таълим соҳаси билан уйғунлашувини таъминлаш, шунингдек, талабалар, иш изловчилар ва иш берувчилар манфаатларини инобатга олган ҳолда 2015 йилнинг 26 июнь куни Тошкент шаҳридаги Инҳа университетида «Очиқ эшиклар куни» ҳамда АКТ ташкилотлари ва компаниялари иштирокида «Карьера ва малака ошириш ярмаркаси» (Internship & Career Fair IUT 2015) ташкил этилди, деб хабар беради «12news.uz».

«Очиқ эшиклар куни» абитуриентлар ҳамда уларнинг ота-оналарига Тошкент шаҳридаги Инҳа университетида яратилган шарт-шароитлар билан яқиндан танишишга имкон яратди. 2015/2016-ўқув йилидаги қабул режаси билан қизиққанларга қуйидаги маълумотлар тақдим этилди. Унга кўра, 120 нафар компьютер инжиниринги, ҳамда 130 нафар дастурий инжиниринг йўналишларида, жами 250 нафар иқтидорли ўғил-қизларни ўқишга қабул қилиш мўлжалланган. Инглиз тилида ёзма тарзда ўтказиладиган математика ва физика фанларидан қабул имтиҳонлари жорий йил 26 июль кунига режалаштирилган. Мазкур имтиҳонларда иштирок этиш учун 17 июлгача онлайн равишда www.inha.uz сайтида рўйхатдан ўтиш керак. Имтиҳонлар фақатгина кореялик мутахассислар томонидан олинади. Ҳафтанинг ҳар сешанба куни (11:00 – 12:00) ва ҳар жума куни (15:00 – 16:00) университет биносининг биринчи қаватида батафсил маълумот олиш мумкин.

«Карьера ва малака ошириш ярмаркаси» (Internship & Career Fair IUT 2015) биринчи бор ўтказилди, ҳамда унда Тошкент шаҳридаги Инҳа университетининг талабалари ва АТ-мутахассисларини тайёрлайдиган бошқа олий ўқув юртларининг талабалари, шунингдек, АКТ соҳасининг бошқа манфаатдор мутахассислари иштирок этишди. Ярмаркада EReport Service, Newmax Technologies, Cumulative Business Solutions, «Осиё Тараққиёт Банки», Brand.uz, East Telecom, Korean Air, BePRO Дастурчилар Маркази, HANJIN Corporation, Avtotest Report каби Ўзбекистон АКТ бозоридаги йирик компаниялар ва ташкилотлар ўз тақдимотларини ўтказди. Шу билан бирга АКТ компанияси вакиллари иш изловчилар билан суҳбат уюштириб, ўз компанияларида малака ошириш имконияти тўғрисида маълумот берди. Университет томонидан компанияларга бепул тарзда ўз тақдимотларини ўтказишлари учун барча шарт-шароитлар яратиб берилди.