Бухоро вилоятида туғилган шахс нафсининг домига тушиб, тез ва осон пул топишни мақсад қилди, деб ёзади «Ҳуқуқ» газетаси.
2014 йилнинг май ойида интернетдаги сайтлардан бирида яхшигина маош тўланадиган иш тўғрисидаги эълонни кўриб қолади ва ўзи ҳақидаги маълумотларни киритади. Уч кундан кейин унга нотаниш киши қўнғироқ қилиб, маълумотлари маъқул келгани, маоши ойига бир ярим миллион сўм экани-ю, ўзи яшайдиган хонадондан ташқари яна бир-иккита уй топиш кераклиги, тез кунда компьютер жамланмаларини юборишини, уларни ўша уйларга жойлаштириши кераклигини айтади.
Бухоролик шахс Яккасарой ва Яшнабод туманидаги танишларининг уйларидан бир хонасини ажратиб беришларини илтимос қилди. Орадан кўп ўтмай унга компьютер жамланмалари ва мамлакатнинг турли ҳудудларида рўйхатдан ўтган бир неча нафар хусусий тадбиркорларнинг номига расмийлаштирилган 156 дона СИМ карта келтириб беришди.
Керакли нарсаларга эришган бухоролик йигит интернет орқали ноқонуний халқаро телефон алоқалари тизимини ташкил қилиб, ишга киришди. Икки ой давомида махсус рухсатномасиз амалга оширилган қўнғироқлар 2 миллион 656 минг 230 дақиқани ташкил қилади. Бу билан эса «Ўзбектелеком» акционерлик компаниясига нақд 148 минг 748 АҚШ долларидан ошиқроқ миқдорда зарар етказилди.
Ҳуқуқни муҳофаза қилувчи органлар ходимлари томонидан ўтказилган тезкор тадбирда бухоролик йигитнинг ноқонуний фаолиятига чек қўйилди.
Интернет тармоғини текин даромад манбаига айлантириб олмоқчи бўлган мазкур кимсага жиноят ишлари бўйича Яшнобод туман суди томонидан тегишли жазо тайинланди.
Изоҳ (0)