Ўзбекистон Республикаси Президенти Ислом Каримов 26 июнь куни Оқсаройда Малайзия, Жазоир Халқ Деморактик Республикаси, Ҳиндистон Республикасининг Ўзбекистондаги Фавқулодда ва мухтор элчилари этиб тайинланган Дато Норайни бинти Абд Ҳамид, Носир Бушерит, Винод Кумардан ишонч ёрлиқларини қабул қилиб олди, деб хабар беради ЎзА.
Ислом Каримов Ўзбекистондаги дипломатик ваколатхоналарнинг янги тайинланган раҳбарларини самимий қутлар экан, Ўзбекистон Малайзия, Жазоир ва Ҳиндистон билан ўзаро муносабатларни янада ривожлантиришга алоҳида аҳамият бераётганини таъкидлади ва уларнинг шарафли ҳамда масъулиятли фаолиятига муваффақият тилади.
Малайзия элчиси билан суҳбатда мамлакатларнинг сиёсий, савдо-иқтисодий соҳалардаги алоқалари, БМТ, Ислом ҳамкорлик ташкилоти ва бошқа халқаро тузилмалар доирасидаги ўзаро ҳамкорлигининг бугунги ҳолати ва уни ривожлантиришнинг истиқболлари муҳокама этилди.
Учрашувда ўзаро ҳамкорликни янги босқичга кўтариш, Ўзбекистон – Малайзия институтлари фаолиятини ва ҳамкорлик механизмларини фаоллаштириш, қўшма иқтисодий лойиҳаларни амалга оширишдан ҳар икки мамлакат ҳам манфаатдор экани таъкидланди.
Элчи Дато Норайни бинти Абд Ҳамид Малайзия ва Ўзбекистон ҳамкорлигини ўзаро манфаатли асосда янада кенгайтириш ва мустаҳкамлашни ўзининг асосий вазифаси, деб билишини таъкидлади.
Ўзбекистон Жазоирга Шимолий Африкадаги энг муҳим ташқи сиёсий шериклардан бири, деб қарайди.
Суҳбат чоғида икки мамлакат ўзаро манфаатли савдони ривожлантириш, инвестициявий ҳамкорликни чуқурлаштириш, маданий-гуманитар ва бошқа соҳалардаги алоқаларни янада кенгайтириш учун катта салоҳиятга эга экани қайд этилди.
Жазоир элчиси икки мамлакат халқларини тарихий, маданий ва маънавий муштарак алоқалар боғлаб туришини таъкидлади ва давлатлар ўртасидаги муносабатларни мустаҳкамлашга муносиб хизмат қилишни ўзи учун улкан шараф, деб билишини қайд этди.
Ўзбекистонда Ҳиндистонни нафақат қадимий тамаддун бешикларидан бири, балки жадал ривожланиб бораётган ва минтақавий ҳамда халқаро муносабатларда муҳим ўрин тутадиган мамлакат сифатида яхши билади.
Ҳиндистон элчиси икки мамлакат ва халқлар ўртасидаги муносабатларни янада ривожлантириш учун бутун куч-ғайрати ва тажрибасини ишга солишини таъкидлади.
Изоҳ (0)