Ishlab chiqarishni ta’lim sohasi bilan uyg‘unlashuvini ta’minlash, shuningdek, talabalar, ish izlovchilar va ish beruvchilar manfaatlarini inobatga olgan holda 2015-yilning 26-iyun kuni Toshkent shahridagi Inha universitetida “Ochiq eshiklar kuni” hamda AKT tashkilotlari va kompaniyalari ishtirokida “Karyera va malaka oshirish yarmarkasi” (Internship & Career Fair IUT 2015) tashkil etildi, deb xabar beradi “12news.uz”.
“Ochiq eshiklar kuni” abituriyentlar hamda ularning ota-onalariga Toshkent shahridagi Inha universitetida yaratilgan shart-sharoitlar bilan yaqindan tanishishga imkon yaratdi. 2015/2016-o‘quv yilidagi qabul rejasi bilan qiziqqanlarga quyidagi ma’lumotlar taqdim etildi. Unga ko‘ra, 120 nafar kompyuter injiniringi, hamda 130 nafar dasturiy injiniring yo‘nalishlarida, jami 250 nafar iqtidorli o‘g‘il-qizlarni o‘qishga qabul qilish mo‘ljallangan. Ingliz tilida yozma tarzda o‘tkaziladigan matematika va fizika fanlaridan qabul imtihonlari joriy yil 26-iyul kuniga rejalashtirilgan. Mazkur imtihonlarda ishtirok etish uchun 17-iyulgacha onlayn ravishda www.inha.uz saytida ro‘yxatdan o‘tish kerak. Imtihonlar faqatgina koreyalik mutaxassislar tomonidan olinadi. Haftaning har seshanba kuni (11:00 – 12:00) va har juma kuni (15:00 – 16:00) universitet binosining birinchi qavatida batafsil ma’lumot olish mumkin.
“Karyera va malaka oshirish yarmarkasi” (Internship & Career Fair IUT 2015) birinchi bor o‘tkazildi, hamda unda Toshkent shahridagi Inha universitetining talabalari va AT-mutaxassislarini tayyorlaydigan boshqa oliy o‘quv yurtlarining talabalari, shuningdek, AKT sohasining boshqa manfaatdor mutaxassislari ishtirok etishdi. Yarmarkada EReport Service, Newmax Technologies, Cumulative Business Solutions, “Osiyo Taraqqiyot Banki”, Brand.uz, East Telecom, Korean Air, BePRO Dasturchilar Markazi, HANJIN Corporation, Avtotest Report kabi O‘zbekiston AKT bozoridagi yirik kompaniyalar va tashkilotlar o‘z taqdimotlarini o‘tkazdi. Shu bilan birga AKT kompaniyasi vakillari ish izlovchilar bilan suhbat uyushtirib, o‘z kompaniyalarida malaka oshirish imkoniyati to‘g‘risida ma’lumot berdi. Universitet tomonidan kompaniyalarga bepul tarzda o‘z taqdimotlarini o‘tkazishlari uchun barcha shart-sharoitlar yaratib berildi.
Izoh (0)