КХДР ҳукумати ижтимоий тузумга зарар етказувчи адабиётлар, шунингдек, ичида турли маълумотлари бор электрон ташувчиларнинг мамлакат ҳудудига кириб келишини олдини олиш мақсадида чегарадаги назоратни кучайтириш ҳақида кўрсатма берди. «ТАСС» хабарига кўра, бу ҳақдаги билдиришнома Пхеньяндаги барча чет эл ваколатхоналарига, шунингдек, дипломатик миссиялар ва халқаро гуманитар ташкилотларнинг идораларига етказилган.
КХДР Ташқи ишлар вазирлигидан маълум қилишларича, мамлакатга ташриф буюраётган баъзи сайёҳлар туристик зоналарда «мамлакат шаънини ерга урувчи ва унинг ижтимоий тузумига зарар етказувчи иғвогарона ташвиқот» маълумотларидан иборат босма маҳсулотлар ва хотира карталарини ташлаб кетмоқда. Пхеньян бундай амалиётни «мамлакатнинг расмий манфаатларига таҳдид сифатида» баҳоламоқда.
2014 йил сентябрида Шимолий Корея ҳукумати чет эл элчихоналари ва консулликларига симсиз алоқадан, жумладан, йўлдош алоқаси ва Wi-Fi технологиясидан берухсат фойдаланишни тақиқлаган эди. Мазкур чора «мамлакат хавфсизлигини таъминлаш мақсадида» кўрилаётгани қайд этиб ўтилганди.
Изоҳ (0)