Европанинг энг кекса эркаги, 8 июнь куни 111 ёшга тўлган Назар Сингҳ вафот этди. The Daily Mail хабарига кўра, британиялик фуқаро 20 июнь, шанба кунига ўтар кечаси ҳаётдан кўз юмган.
Аввалроқ 111 ёшли эркак ўз таваллуд айёмини бир кружка пиво ва бир бокал виски билан нишонлагани ҳақида хабар берилган эди. Сингҳ ўзининг узоқ яшаш сири сифатида кўп ухлаш, соғлом ҳаёт тарзи ва мазкур спиртли ичимлик истеъмолини кўрсатганди.
Назар Сингҳ 1904 йил 8 июнь куни Ҳиндистондаги кичик бир қишлоқда туғилган. 10 ёшидан бошлаб шакарқамиш, пахта, маккажўхори, буғдой етиштиришда оилага кўмак берган. У бундан тўрт йил аввал боғдорчилик билан шуғулланишни бас қилганди.
1932 йили Назар Сингҳ қўшни қишлоқда яшайдиган Нараян Куар исмли қиз билан келишув бўйича оила қурган, улар биргаликда тўққиз фарзанд кўрган. Унинг турмуш ўртоғи 12 йил аввал, 90 ёшида вафот этган. Эркакнинг 34 невараси ва 64 чевараси бор. Сингҳнинг тўнғич фарзанди яқинда 78 ёшга тўлди.
1965 йили Назар Сингҳ оиласи билан Англияга кўчиб ўтиб, қарийб 25 йил қуюв заводида ишлади.
Изоҳ (0)