Ўзбекистон халқ артисти Комилжон Отаниёзов хотирасига бағишланган Республика кўрик-танлови 2015 йилнинг 25 июнь куни соат 10:00 да Хоразм вилояти Шовот тумани Комилжон Отаниёзов номидаги маданият ва истироҳат боғида бўлиб ўтади. Бу ҳақда танлов ташкилотчиси Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази матбуот хизмати хабар бермоқда.
Тадбирдан кўзланган асосий мақсад 2015 йилнинг «Кексаларни эъзозлаш йили» Давлат дастури ижросини таъминлаш, Ўзбекистон халқ артисти Комилжон Отаниёзов яратган улкан ижодий услубни ёшлар орасида кенг тарғиб этиш, унинг бой маданий меросига эҳтиром кўрсатиш, устоз санъаткорнинг баланд пардаларда куйлаган Сегоҳ, Дугоҳ, Феруз, Сувора ҳамда бошқа ашула ва қўшиқларини ижро эта оладиган ёш истеъдод соҳибларини аниқлаш, ўзбек миллий ва мумтоз санъатини келажак авлод онгига чуқур сингдириш, иқтидорли ҳаваскор ёшларни қўллаб-қувватлаш ва уларнинг катта саҳналарда ҳам ўз овоз имкониятларини намойиш этишларига ёрдам кўрсатишдан иборат.
Кўрик-танлов Ўзбекистон Республикаси Маданият ва спорт ишлари вазирлиги Республика халқ ижодиёти ва маданий-маърифий ишлар илмий-методик маркази, Ўзбекистон Миллий телерадиокомпанияси, Хоразм вилояти ҳокимияти ҳамда Маданият ва спорт ишлари бошқармаси билан ҳамкорликда ўтказилмоқда.
Изоҳ (0)