Олий хўжалик суди пленуми мажлиси ўтказилди

Ўзбекистон Республикаси Олий хўжалик суди пленумининг навбатдаги мажлиси бўлиб ўтди, деб хабар беради ЎзА.

Унда Олий хўжалик судининг судьялари, Олий Мажлис Сенати аъзолари ва Қонунчилик палатаси депутатлари, ҳуқуқни муҳофаза қилувчи ва назорат қилувчи органларнинг масъул ходимлари, ҳуқуқшунос олимлар, видеоконференцалоқа тизими орқали Қорақалпоғистон Республикаси, вилоятлар хўжалик судлари судьялари ва прокуратура ходимлари иштирок этди.

Мажлисни Ўзбекистон Республикаси Олий хўжалик суди раиси К.Комилов бошқариб борди.

Ўзбекистон Конституциясининг 44-моддасида ҳар бир шахс ўз ҳуқуқ ва эркинликларини суд орқали ҳимоя қилиши кафолатланган. Фуқаролик кодексига асосан даъво муддати – шахс ўзининг бузилган ҳуқуқини даъво қўзғатиш йўли билан ҳимоя қилиши мумкин бўлган муддатдир.

Даъво муддатига оид нормаларни қўллаш бўйича суд амалиёти таҳлили ушбу масалада тушунтириш берилишини тақозо этмоқда. Пленум мажлисида «Хўжалик судлари томонидан фуқаролик қонун ҳужжатларининг даъво муддатига оид нормаларини қўллашнинг айрим масалалари ҳақида»ги қарор лойиҳаси кўриб чиқилди. Унда фуқаролик қонун ҳужжатларининг даъво муддатини қўллашга оид нормаларини тўғри ва бир хилда қўлланилишини таъминлаш юзасидан хўжалик судларига аниқ тушунтиришлар берилган.

Мажлисда «Ўзбекистон Республикаси Хўжалик процессуал кодексининг процессуал муддатларига оид нормаларини хўжалик судлари томонидан қўлланилишининг айрим масалалари ҳақида»ги қарор лойиҳаси ҳам муҳокама қилинди.

Йиғилишда Ўзбекистон Республикаси Олий хўжалик суди пленумининг айрим қарорларига ўзгартиш ва қўшимчалар киритиш тўғрисидаги масала ҳам кўриб чиқилди.

Пленум мажлисида муҳокама этилган масалалар юзасидан қарорлар қабул қилинди.

Мажлисда Ўзбекистон Республикаси Бош прокурори И.Абдуллаев иштирок этди.