Зимбабведаги банк омонатчилари, агар уларнинг омонатлари миқдори маҳаллий долларда 175 квадриллионни ташкил этса, 5 АҚШ доллари миқдорида пул олади. Бу ҳақда мамлакат Марказий банки баёнотида маълумот берилган.
Агар омонат миқдори 175 квадриллион доллардан ошса, у ҳолда 1 АҚШ доллари учун 35 квадриллион Зимбабве долларидан ҳисоблаб, пул чиқариб берилади. Бундан ташқари, 15 июндан бошлаб сентябрь охирига қадар Зимбабве долларлари босқичма-босқич муомаладан чиқарилади.
Инфляция даражаси ҳаддан ташқари юқори эканлиги сабаб, Зимбабве Марказий банки охирги марта 2008 йили 100 триллион доллар миқдоридаги банкноталарни муомалага киритганди; 2009 йилдан бошлаб Зимбабве ўз миллий валютасини эмитация қилишни тўхтатиб, ҳисоб-китоблар учун хорижий валютадан, жумладан, АҚШ доллар ва Жанубий Африка рандидан фойдаланишни бошлаганди.
Глобал молиявий инқироз вақтида Зимбабведаги инфляция даражаси рекорд кўрсаткичларни қайд этди. Расмий статистикага кўра, мамлакатда нархлар 231 миллион фоизга ўсган, бироқ таҳлилчиларнинг ҳисоб-китобига кўра, нархлар аслида 4 миллиард фоизга ошган. Ҳозирги вақтда Зимбабведа дефляция кузатилмоқда: апрель ойида мамлакатда нархлар 2,65 фоизга арзонлашди.
Изоҳ (0)