Volvo компанияси Америка ва Швеция қўшиқчиси Маpei билан махсус лойиҳа доирасида клип суратга олди, унда FH шатакчиси икки ғилдиракда турган ҳолда 45 даража бурчак остида энгашиб камера олдидан ўтиб кетади, дея хабар бермоқда «Motor.ru».
Юк машинаси иштирокидаги трюкни Берлин ташқарисида суратга олишди, уни италиялик профессионал каскадёр бошқарди. Машинани чап икки ғилдиракда турғазиш учун у қия платформага ўнг ғилдираклар билан чиқиб, сўнг ундан сакраб тушиши керак эди. Бироқ ағдарилишдан ҳимояланган FH ҳайдовчига белгиланган масофани икки ғилдиракда босиб ўтишга имкон бермади ва ўзини тўрт ғилдиракли ҳолатга қайтариб олаверди.
Съёмка жараёнида қатнашиб, юк машинаси ҳолатини кузатиб турган Volvo операторлари хавфсизлик тизимини ўчиргач, муаммо ҳал бўлди ва ҳайдовчи трюкни амалга оширди. Биринчи дублда қўшиқчи хатоликка йўл қўйгач, бундай мураккаб трюкни каскадёр иккинчи марта ҳам такрорлашга мажбур бўлди.
Изоҳ (0)