Гёте институтида маданий фаолиятларни ижтимоий тармоқларда ёритиш бўйича семинар-тренинг ўтказилади

Гёте институтининг Тошкентдаги ваколатхонаси OXUS Culture ташкилоти билан ҳамкорликда маданият ва санъат соҳасида фаолият юритаётган ёшлар учун ижтимоий тармоқларда ўз ҳудуди маданияти ва санъати, тарихий обидалари, номоддий ва моддий маданий ёдгорликлари тўғрисида маълумотлар бериш, маданий маҳсулотларни кенг тарқатиш, халқаро ва ҳудудлараро маданий муносабатларни йўлга қўйиш мақсадларига қаратилган семинар-тренинглар ташкил этмоқда. Бу ҳақда OXUS Culture’нинг Facebook тармоғидаги саҳифасида хабар берилмоқда.

Ушбу семинар-тренингни республиканинг ҳар бир ҳудуди учун ўтказиш режалаштирилган бўлиб, илк семинар-тренингда фақат қорақалпоғистонлик қизиқувчилар иштирок этишлари мумкин.

Семинар-тренинг Тошкент шаҳрида шу йилнинг 3—5 июль кунлари, Гёте институти биносида ташкил этилади. Ушбу лойиҳанинг мураббийлари сифатида, ҳозирда хусусий сектор маҳсулотларини ижтимоий тармоқларда реклама қилиш, саҳифаларини юритишда катта тажрибага эга мутахассислар таклиф этилган. Тренингда турли ижтимоий тармоқларнинг техник имкониятлари, қоидалари, мазмун ва моҳияти тўғрисида маълумот бериш билан биргаликда, улардан фойдаланишнинг амалий асослари ҳам ўргатилади. Семинар якунида лойиҳа ҳамкори Ucell мобил оператори томонидан бир йиллик белгиланган трафикка эга бепул интернет алоқа USB-модем тақдим этилади. Танловда иштирок этиш шартлари билан яқиндан танишиш ва ариза бериш учун oxusculture@gmail.com электрон манзилига мурожаат қилиш мумкин.

Тренингга иштирок этишни истовчиларнинг аризалари 15 июнга қадар қабул қилинади.