ZiyoNET таълим тармоғининг «Ўзбекистоннинг маданий мероси» бўлимида «Ўзбекистоннинг етти мўъжизаси»ни аниқлаш бўйича ўтказаётган акцияси давом этмоқда, деб хабар беради ZiyoNET Ресурс маркази ахборот хизмати.
Олдинроқ «Ўзбекистоннинг етти мўъжизаси» акцияси уч босқичда ўтказилишини хабар қилгандик.
Объектлар учун овоз бериш чегараланмаган, фақатгина бир кеча-кундузда бир марта овоз бериш мумкин. Овоз бериш натижасидан олдин минтақавий мўъжизалар, ундан кейин «Ўзбекистоннинг етти мўъжизаси» аниқланади.
Ҳар бир таклифга киритилган объект ва у бўйича материаллар барча манбалар орқали текширилади ҳамда интернет материаллари билан солиштирилади.
Акция бошлангандан буён жуда кўп қизиқарли объектлар таклифи киритилди. Учқудуқ—Нукус автомобиль йўли яқинидаги Жарақудуқдаги «Тош ўрмон», қадимий одамнинг 50 минг йиллик қолдиқлари топилган Чорвоқ сув омбори яқинидаги Обираҳмат қояси, Қорақалпоғистон чўлларидаги Чилпиқ қалъаси, Хоразмдаги «Қўйқирилган қалъа» астрономик иншооти, Навоий шаҳри яқинидаги Сангижуманда ҳатто ёш бола ҳам бир бармоғи билан қимирлатиб юбориши мумкин бўлган 300 тонна келадиган қимирловчи тош ва йўқолиб кетган деб ҳисобланган ноёб нок дарахтларини бунга мисол қилиб келтириш мумкин.
Ҳозирги кунда ZiyoNET таълим тармоғининг «Ўзбекистон маданий мероси» бўлимида 240 дан ортиқ объектлар тўғрисида маълумотлар жойлаштирилган.
Изоҳ (0)