Ўзбекистон давлат жаҳон тиллари университетида жаҳон тиллари ва маданияти фестивали ташкил этилди, деб хабар бермоқда ЎзА. Унда университет профессор-ўқитувчилари ва талабалари, хорижий мамлакатларнинг Ўзбекистондаги фавқулодда ва мухтор элчилари, турли халқаро ташкилотлар вакиллари, оммавий ахборот воситалари ходимлари иштирок этди.
Фестивальга келган меҳмонларни талабалар Ўзбекистоннинг турли ҳудудларига оид урф-одатлар, Ғарб ва Шарқ халқларининг асрий анъаналари ва турмуш тарзини акс эттирувчи тақдимотлар билан кутиб олди.
Университет ректори Ш.Қаюмов ва бошқалар Президентимиз Ислом Каримов раҳнамолигида мамлакатимизда ҳуқуқий демократик давлат, эркин фуқаролик жамиятини қуриш жараёнида ёшлар маънавиятини юксалтиришга, уларнинг онгу қалбида соғлом турмуш тарзи, миллатлараро бағрикенглик, миллий ва умуминсоний қадриятларга ҳурмат-эҳтиром туйғуларини қарор топтиришга алоҳида эътибор қаратилаётганини таъкидлади.
– Университетимизда 6150 талаба таҳсил олмоқда, – дейди университетнинг маънавият ва маърифат бўлими бошлиғи Эргаш Боборажабов. – Президентимизнинг 2013 йил 23 майдаги «Ўзбекистон давлат жаҳон тиллари университетининг фаолиятини такомиллаштириш чора-тадбирлари тўғрисида»ги қарори таълим-тарбия ишларини янги босқичга кўтаришда муҳим асос бўлмоқда. Таълим муассасамизда таълим жараёнини халқаро ўқитиш стандартларига мослаштириш, замонавий педагогик технологияларни кенг жорий этиш билан бирга, талабаларнинг давр билан ҳамнафас яшаши, дунё ёшлари билан интеграциялашиши, маданияти ва маънавиятини юксалтиришига алоҳида эътибор берилмоқда. Мазкур фестиваль бу борадаги амалий ишлардан биридир.
Талабалар иштирокида университет билан ҳамкорлик ўрнатган АҚШ, Япония, Буюк Британия, Франция, Германия, Испания, Хитой, Ҳиндистон ва бошқа йигирмадан ортиқ мамлакат халқларининг тарихи, турмуш тарзи, маданияти ва урф-одатлари ҳақида маълумот берувчи бадиий чиқишлар, саҳна кўринишлари, куй-қўшиқ ва рақслар намойиш этилди.
– Ушбу фестивалда бошқа халқларнинг урф-одат ва анъаналари, маданиятига оид билимларимизни мустаҳкамлаш билан бирга чет эллик меҳмонларга миллий қадриятларимизни, миллий кийим ва таомларимизни намойиш этдик, – дейди талаба Фарҳод Шарипов. – Бу уларда катта таассурот қолдирди. Доира чалиб «Омон ёр»ни куйлаганимда меҳмонлар атрофимни ўраб олди, катта қизиқиш билан тинглади.
– Фестиваль туфайли Ўзбекистон ҳақидаги билимларим янада ортди, – дейди Италиянинг мамлакатимиздаги Фавқулодда ва мухтор элчиси Риккардо Манара. – Айниқса, талабаларнинг хорижий тилларда равон сўзлаётгани, аждодлардан қолган бой меросингиз ва урф-одатларингизни юксак меҳр-муҳаббат билан намойиш этаётганини кўриб ҳайратландим. Бу Ўзбекистонда ёшлар масаласига катта эътибор қаратилаётганидан далолатдир.
Изоҳ (0)