O‘zbekiston davlat jahon tillari universitetida jahon tillari va madaniyati festivali tashkil etildi, deb xabar bermoqda O‘zA. Unda universitet professor-o‘qituvchilari va talabalari, xorijiy mamlakatlarning O‘zbekistondagi favqulodda va muxtor elchilari, turli xalqaro tashkilotlar vakillari, ommaviy axborot vositalari xodimlari ishtirok etdi.
Festivalga kelgan mehmonlarni talabalar O‘zbekistonning turli hududlariga oid urf-odatlar, G‘arb va Sharq xalqlarining asriy an’analari va turmush tarzini aks ettiruvchi taqdimotlar bilan kutib oldi.
Universitet rektori Sh.Qayumov va boshqalar Prezidentimiz Islom Karimov rahnamoligida mamlakatimizda huquqiy demokratik davlat, erkin fuqarolik jamiyatini qurish jarayonida yoshlar ma’naviyatini yuksaltirishga, ularning ongu qalbida sog‘lom turmush tarzi, millatlararo bag‘rikenglik, milliy va umuminsoniy qadriyatlarga hurmat-ehtirom tuyg‘ularini qaror toptirishga alohida e’tibor qaratilayotganini ta’kidladi.
– Universitetimizda 6150 talaba tahsil olmoqda, – deydi universitetning ma’naviyat va ma’rifat bo‘limi boshlig‘i Ergash Boborajabov. – Prezidentimizning 2013-yil 23-maydagi “O‘zbekiston davlat jahon tillari universitetining faoliyatini takomillashtirish chora-tadbirlari to‘g‘risida”gi qarori ta’lim-tarbiya ishlarini yangi bosqichga ko‘tarishda muhim asos bo‘lmoqda. Ta’lim muassasamizda ta’lim jarayonini xalqaro o‘qitish standartlariga moslashtirish, zamonaviy pedagogik texnologiyalarni keng joriy etish bilan birga, talabalarning davr bilan hamnafas yashashi, dunyo yoshlari bilan integratsiyalashishi, madaniyati va ma’naviyatini yuksaltirishiga alohida e’tibor berilmoqda. Mazkur festival bu boradagi amaliy ishlardan biridir.
Talabalar ishtirokida universitet bilan hamkorlik o‘rnatgan AQSh, Yaponiya, Buyuk Britaniya, Fransiya, Germaniya, Ispaniya, Xitoy, Hindiston va boshqa yigirmadan ortiq mamlakat xalqlarining tarixi, turmush tarzi, madaniyati va urf-odatlari haqida ma’lumot beruvchi badiiy chiqishlar, sahna ko‘rinishlari, kuy-qo‘shiq va raqslar namoyish etildi.
– Ushbu festivalda boshqa xalqlarning urf-odat va an’analari, madaniyatiga oid bilimlarimizni mustahkamlash bilan birga chet ellik mehmonlarga milliy qadriyatlarimizni, milliy kiyim va taomlarimizni namoyish etdik, – deydi talaba Farhod Sharipov. – Bu ularda katta taassurot qoldirdi. Doira chalib “Omon yor”ni kuylaganimda mehmonlar atrofimni o‘rab oldi, katta qiziqish bilan tingladi.
– Festival tufayli O‘zbekiston haqidagi bilimlarim yanada ortdi, – deydi Italiyaning mamlakatimizdagi Favqulodda va muxtor elchisi Rikkardo Manara. – Ayniqsa, talabalarning xorijiy tillarda ravon so‘zlayotgani, ajdodlardan qolgan boy merosingiz va urf-odatlaringizni yuksak mehr-muhabbat bilan namoyish etayotganini ko‘rib hayratlandim. Bu O‘zbekistonda yoshlar masalasiga katta e’tibor qaratilayotganidan dalolatdir.
Izoh (0)