Ўзбекистон аҳолисининг ярмидан ортиғи ортиқча вазнга эга (тана массаси индекси 25 кг/м2 га тенг ёки ундан ортиқ). Айни вақтда мамлакатнинг ҳар бешинчи фуқароси (аҳолининг 20,1 фоизи) семиришдан азият чекади (тана массаси индекси 30 кг/м2 га тенг ёки ундан ортиқ). Бу ҳақда «Газета.uz» хабар бермоқда.
Ушбу маълумотлар Ўзбекистон Соғлиқни сақлаш вазирлиги томонидан 2014 йилнинг январь апрель ойларида Жаҳон банки «Саломатлик-3» лойиҳаси доирасида Жаҳон соғлиқни сақлаш ташкилоти (ЖССТ)нинг халқаро мутахассислари кўмагида ўтказилган тадқиқот натижаларига кўра олинди. Тадқиқотда 18-64 ёш оралиғидаги 4350 киши иштирок этди. Тадқиқот уч босқичда – респондентлар ўртасида сўров, шунингдек, жисмоний (бўй, оғирлик, бел ва бўксаларнинг айланаси, қон босими) ва биокимёвий (қондаги холестерин ва глюкоза миқдори) кўрсаткичларни аниқлаш бўйича ўтказилди.
Тадқиқот натижалари Ўзбекистон аҳолиси учун бир қатор муаммоли жиҳатлар борлигини, уларни ҳал қилиш ва бартараф этиш бўйича фаол чоралар кўриш кераклигини кўрсатди. Хусусан, овқатланиш ва жисмоний фаолликнинг озлиги билан боғлиқ муаммолар энг долзарб бўлиб турибди. Маълум бўлишича, Ўзбекистон аҳолисининг учдан икки қисми (67,2 фоизи) ҳар куни етарли миқдорда мева ва сабзавот истеъмол қилмайди, аҳолини қарийб ярми (46,3 фоизи)нинг қони таркибида холестерин миқдори керагидан ортиқ.
Аҳолининг учдан бир қисми (30,8 фоизи)да юқори артериал босим борлиги, 9,1 фоизининг қони таркибида глюкоза миқдори белгиланидан юқори эканлигини аниқланди. Тадқиқот мамлакат миқёсида алкоголь ва тамаки маҳсулотлари истеъмоли кўламига баҳо бериш имконини берди. 18-64 ёш оралиғида асосан эркаклар алкоголь ва тамакини кўп истеъмол қилиши маълум бўлди – уларнинг 30,7 фоизи сўнгги 30 кун давомида алкоголь ва 42,4 фоизи тамаки маҳсулотини истеъмол қилган. Аёллар орасида эса кўрсаткичлар сезиларли паст – мос равишда 5,7 ва 1,5 фоиз.
Тадқиқотчилар фикрича, 40-64 ёш оралиғидаги аҳолининг 20 фоиздан ортиғида юрак-қон томир касалликлари ривожланиши хавфи борлиги жуда хавотирлидир ва бу яқин 10 йил ичида жиддий асоратлар (миокард инфаркти, инсульт ва буйрак касалликлари) ривожланиши эҳтимолини билдиради. Тадқиқот натижаларига кўра, Ўзбекистон аҳолисининг ҳар 9 нафаридан биттаси (11 фоизи)да инфекцион бўлмаган касалликлар таҳдиди йўқ, улар асосан ёшлардир. Аҳолининг 66,4 фоизи инфекцион бўлмаган касалликларнинг қўзғашининг камида 1-2та, 22,6 фоизида эса бир вақтнинг ўзида 3-5тагача таҳдидлари мавжуд. «Шаҳар – қишлоқ» кесимида таҳдид омиллари кескин фарқ қилмайди.
ЖССТнинг Ўзбекистондаги вакили Асмус Хаммерихнинг қайд этишича, юрак-қон томир ҳасталиклари, саратон, нафас олиш органларининг сурункали ҳасталиги ва қандли диабет каби инфекцион бўлмаган касалликлар бутун жаҳон бўйлаб ногиронлик ва ўлим ҳолатларининг асосий сабаблари ҳисобланади. Қайд этишларича, бу каби сўровнома ва тадқиқотларни Ўзбекистонда ҳар беш йилда ўтказиш режалаштирилмоқда.
Изоҳ (0)