Жаҳон иқтисодиёти ва дипломатия университетида 10-БМТ Модели ўтказилди
16—17 май кунлари Жаҳон иқтисодиёти ва дипломатия университетида БМТ Ахборот офиси томонидан ташкил қилинган БМТ Модели конференцияси бўлиб ўтди, деб хабар қилади UzDaily.
БМТ Модели университетда 10 марта ўтказилди. БМТ Моделининг бу йилги конференциясида ЖИДУдан ташқари Ўзбекистон давлат жаҳон тиллари университети, Тошкент давлат шарқшунослик институти, Тошкент халқаро Вестминстер университети, Тошкентдаги Сингапур менежментни ривожлантириш институти, Тошкент молия институти, Тошкентдаги Турин политехника университети, Тошкентдаги Инҳа университети, Тошкент темир йўл муҳандислари институти, Навоий давлат педагогика институти ҳамда Андижон, Гулистон ва Урганч давлат университетларининг 132 нафар талабаси иштирок этди.
Қатнашчилар конференцияда 3 қўмита – БМТ Хавфсизлик Кенгаши, Жаҳон соғлиқни сақлаш ташкилоти ҳамда БМТ Бош Ассамблеясининг 5-қўмитасининг айни дамда долзарб бўлган мавзулари бўйича мажлис ўтказди.
Конференциянинг биринчи кунида бош ва норасмий дебатлардан кейин ҳар бир қўмитада қарорлар қабул қилинди. Эртаси куни тадбирнинг ёпилиш маросимида БМТ Ахборот офиси томонидан фаол қатнашчилар учун сертификат ва эсдалик совғалари топширилди.
