Тошкент шаҳрида Ўзбекистон онкологларининг III конгресси бўлиб ўтди. Бу ҳақда 12news.uz хабар бермоқда.
Ўзбекистон Соғлиқни сақлаш вазирлиги, Республика Онкология илмий маркази ҳамда Онкологлар уюшмаси томонидан ташкил этилган анжуманда Ўзбекистон шифокорлари, АҚШ, Жанубий Корея, Япония, Австрия, Германия, Канада, Голландия, Франция, Швейцария, Ҳиндистон каби мамлакатлардан келган 200га яқин олимлар, халқаро ташкилотлар вакиллари, ёш тадқиқотчилар иштирок этди.
Анжуман қатнашчилари дунё мамлакатларида хавфли ўсмалар билан касалланиш кўрсаткичлари, айниқса, ишлаб чиқариши ривожланган, экологик муҳити носоғлом бўлган давлатларда йилдан йилга ортиб бораётганини қайд этди. Мазкур конгресс ушбу кўнгилсиз ҳолатни бартараф этиш, онкологияни илмий ва амалий жиҳатдан ривожлантириш борасидаги ҳамкорликни янги босқичга олиб чиқишда муҳим аҳамият касб этади.
Тадбирда Ўзбекистон онкологлари ютуқлари ва бу соҳадаги устувор йўналишлар, дунёда онкологик тиббий ёрдам кўрсатишнинг бугунги ҳолати, соҳада қўлланилаётган технологиялар, замонавий онкология жарроҳлиги асослари, болалар онкологияси, пластик ва реконструктив жарроҳлик, онкоортопедияга оид маърузалар тингланди, фикр алмашилди.
Изоҳ (0)