АҚШнинг Калифорния штатида яшовчи 42 ёшли хитойлик Шенгхуа Вен Шимолий Кореяга қурол ва ўқ-дорилар юборгани учун 8 йилга озодликдан маҳрум этилди. Бу ҳақда CNN хабар берди.
Маълум қилинишича, Вен 2025 йил июнь ойида “халқаро иқтисодий фавқулодда вазиятлар тўғрисидаги қонунни бузиш бўйича тил бириктириш” ва “хорижий давлат агенти сифатида ноқонуний фаолият юритиш” жиноятларида айбдор деб топилган. Эркак ушбу қуроллар Жанубий Кореяда кутилмаган ҳужумларда ишлатиш учун мўлжалланганини тан олган. АҚШ прокуратураси маълумотларига кўра, эркак 2012 йилда Хитойдан талабалар визаси билан келган, бироқ белгиланган муддат тугаганидан кейин ҳам мамлакатда ноқонуний қолиб кетган.
Суриштирувда Вен АҚШга келишидан олдин Хитойдаги Шимолий Корея элчихонасида Пхеньян расмийлари билан учрашгани, улардан ҳукумат учун маҳсулотлар топиш бўйича кўрсатма олгани аниқланган. У, шунингдек, КХДР аскарларини яширин ҳужумларда ниқоблаш учун ҳарбий кийим сотиб олишга уринган.
Прокуратура маълумотларига кўра, 2022 йилда Шимолий Корея амалдорлари унга мессенжер орқали алоқага чиқиб, қурол сотиб олишни буюрган. У 2023 йилда Лонг Бич (Калифорния) портидан Гонгконг орқали Шимолий Кореяга икки контейнер қурол ва бошқа буюмларни юборган. Вен бу иш учун тахминан 2 миллион доллар олганига ҳам иқрор бўлган.
У ўз фаолиятини амалга ошириш учун 2023 йилда Супер Арморй номли қурол савдоси лицензиясига эга компанияни 150 минг долларга сотиб олиб, уни шериги номига Техасда рўйхатдан ўтказган. Вен қуролларни бошқа шахслар номидан харид қилиб, кейин Калифорнияга олиб келган ва юкларни музлатгич ёки камера қисмлари сифатида кўрсатган.
ФҚБ 2024 йил сентябрь ойида Веннинг Лос Анжелес яқинидаги уйидан 50 минг дона ўқ-дори, шунингдек, кимёвий хавф аниқлаш мосламаси ва радиоалоқа ускуналарини топган. Вен бу жиҳозларни ҳам Шимолий Корея ҳукуматига юборишни режалаштирганини тан олган.
БМТ резолюцияларига кўра, Шимолий Кореяга қурол олиб кириш ёки ташқарига чиқариш қатъиян тақиқланади. Шу билан бирга, Пхеньян сўнгги йилларда Жанубий Корея чегарасига ядровий қурол таший оладиган ракета тизимларини жойлаштириб, халқаро ҳамжамиятни хавотирга солмоқда.
Изоҳ (0)