Ўзбекистон терма жамоаси ярим ҳимоячиси Аббос Файзуллаевнинг Москванинг “ЦСКА” клубидан Туркиянинг “Истанбул Башакшеҳир” жамоасига ўтиши расман амалга ошди. Аввалроқ футболчининг трансфери бўйича тўлов жараёнида техник муаммолар юзага келгани туфайли у янги жамоасида дебют қила олмаётгани ҳақида хабарлар тарқалган эди.
“ЦСКА” клуби матбуот хизматининг маълум қилишича, турк жамоаси трансфер учун белгиланган маблағни тўлиқ тўлаган. Шундан сўнг россияликлар дарҳол футболчининг халқаро трансфер сертификатини юборишган.
Пул маблағи тушгач, биз шартномага мувофиқ трансфер сертификатини жўнатдик ва битим тўлиқ якунланди. “Башакшеҳир” клубига ҳам, Аббос Файзуллаевнинг агенти Герман Ткаченкога ҳам миннатдорчилик билдирамиз. Аббоснинг “ЦСКА”га келиши клуб учун ҳар томонлама фойдали бўлди. Унга янги босқичда муваффақиятлар тилаймиз, — деди “ЦСКА” директори Кирилл Брейдо.
Файзуллаевнинг “Башакшеҳир” сафидаги дебюти 21 август куни бўлиб ўтиши кутилмоқда. Унда турк клуби УЕФА Конференциялар Лигаси доирасида Руминиянинг “Университатя” жамоасига қарши майдонга тушади. 24 август куни эса Туркия Суперлигаси доирасида яна бир ўзбекистонлик футболчи — Ҳусниддин Алиқулов ҳаракат қилаётган “Ризеспор” билан ўйин режалаштирилган.
Изоҳ (0)