АҚШ давлат котиби Жон Керри 16 май куни Хитойга ташриф буюрди. Керри икки кун давомида Хитойда бўлади ва бир қатор расмий учрашувлар ўтказади, деб хабар қилади «Эхо Москвы».
Хитой Халқ Республикаси пойтахтига ташрифи давомида Жон Керри ёзда бўлиб ўтадиган «Стратегик ва иқтисодий диалог» форумига тайёргарлик доирасида Хитой раҳбарлари билан музокара ўтказади. Бундан ташқари, Хитой етакчиси Си Цзиньпиннинг кузда АҚШга режалаштирилган ташрифи ҳам муҳокама қилинади.
Пекиндан сўнг Керри дарҳол Сеулга йўл олади. АҚШ давлат котиби Жанубий Корея президенти Пак Кин Хэ ва республиканинг ташқи ишлар вазири билан учрашади. Томонлар икки томонлама масалалар ва қўшни КХДРдаги вазиятни муҳокама қилади.
Керри Хитой ташқи ишлар вазири Ван И билан бўлиб ўтган қўшма матбуот анжуманида Хитой ҳукумати Жанубий Хитой денгизидаги кескинликни камайтириши кераклигини айтиб ўтди.
Эслатиб ўтамиз, Керри Хитойга боришдан олдин Россияда Владимир Путин билан учрашганди.
Изоҳ (0)