6 май куни Германиянинг Daimler автоконцерни дунёдаги биринчи ўз-ўзини бошқарувчи юк машинаси тақдим этилди, уни АҚШдаги жамоат йўлларида ишлатиш учун расман рухсат берилган. Бу ҳақда TJournal хабар бермоқда.
Freightliner Inspiration Truck ўз-ўзини бошқара олса-да, уни тўлиқ ҳайдовчисиз деб атаб бўлмайди: кабинада барибир кимдир доимий равишда бўлиб туриши керак.
Синовлар чоғида Германия йўлларининг 16 минг километрини муваффақиятли тарзда босиб ўтган юк машинаси камералар, сенсорлар, радар ва улар орқали олинган ахборотга ишлов берувчи илғор компьютер ускуналари билан жиҳозланган.
Машина берилган тезликни сақлаб туриш, маълум полосадан чиқмай юриш, тўсиқлар қаршисида тормоз бериш ва потенциал хавфли бўлган йўл вазиятларида секинлашиш хусусиятига эга.
Inspiration Truck ҳайдовчиси вақтнинг кўп қисмида ўз ишлари билан шуғулланиши мумкин. Юк машинаси катта йўлдан кичик йўлларга ўтиши ёки юкни тушириш учун тўхташи керак бўлган пайтлардагина унинг эътибори талаб этилади.
Айни пайтда юк машинасини синаш жараёнлари давом этмоқда, технология қачон сотувга чиқарилиши хабар берилмаяпти.
Изоҳ (0)