Хабарингиз бор, 2014 йил кузидан буён Тошкентда ташқи кузатув камералари ўрнатиш ишлари олиб бориляпти. Бу камералардан шаҳардаги автомобиль ва пиёдалар оқимини бошқариш, қоидабузарликларнинг олдини олиш, қоидабузарларни эса жазолашда фойдаланилади.
Афсуски, ҳозир кўчаларимиздаги ҳаракатни тартибли, деб бўлмайди. КҲАЙ/Бодомзор йўли чорраҳасида бир соат ичида 85 та қоидабузарлик, Юнусобод туман ҳокимияти олдидаги пиёдалар ўтиш йўлида бир соат ичида 600 га яқин қоидабузарлик ҳақида хабар берган эдик. Бундан ташқари, қоидаларга риоя қилмаслик оқибатида шаҳримизда ҳар куни аянчли йўл-транспорт ҳалокатлари бўлмоқда.
Ўрнатилаётган камералар ана шундай айнчли ҳолатларнинг олдини олиб, йўл ҳаракати иштирокчилари соғлиғи ва мулкини сақлаб қолишга, давлатимиз бюджетини тўлдиришга ёрдам беради, деган умиддамиз.
Тошкентнинг Муқимий ва Акрамхўжаев кўчалари чорраҳасида ташқи кузатув камераларини ўрнатиш ишлари якунига етай деб қолди. «Дарё» мухбири томонидан тайёрланган фоторепортажни эътиборингизга ҳавола этамиз.
Эслатиб ўтамиз, автомобиллар ҳаракатини бошқариш, ташқи кузатув камераларини ўрнатиш ишлари Швейцариянинг AGT International компанияси томонидан олиб борилаётгани ҳақида хабар берган эдик. Муқимий кўчасида ўрнатилган электр шкафи эса Сербиянинг Vlatacom компанияси томонидан ишлаб чиқарилган. Компания сайтида хабар берилишича, Vlatacom'нинг Safe City номли дастури доирасида компания кузатув камераларини ўрнатиш, транспорт оқимини бошқариш тизимларини жорий этиш билан шуғулланади. Кўчада ўрнатилган светофорлар ким томонидан — AGT, Vlatacom ёки маҳаллий мутахассислар томонидан ўрнатилгани ҳақида маълумот йўқ.
Таъкидлаш жоиз, Муқимий ва Акрамхўжаев кўчалари чорраҳасида атроф-муҳитни кузатишга мўлжалланган камералар светофорлар ёнидаги симёғочларга ўрнатилган, аммо светофорлар жойлашган кронштейнларга автомобиллар томон йўналтирилган камералар ўрнатилмаган.
Ўрнатилган янги светофорларга ҳавас билан қараб турган чоғимизда, нақ учта қип-қизил чироқни «кўрмай қолган» «кўча қироли» — 01 U 585 АА давлат рақамига эга Matiz светофорда тўхтаб турган автомобилларни ўнг томондан айланиб ўтиб, ҳаракатланишда давом этди.
Қойил-э! Нимаям дердик.
Изоҳ (0)