12 минг муҳожир Ямандан Сомали ва Жибутига етиб келди

Ямандаги низолар кучайиши натижасида 12 мингдан ортиқ мигрантлар Сомали ва Жибутига кўчиб ўтди, деб хабар қилади «РИА Новости».

Халқаро муҳожирлик ташкилоти вакили Жоэль Миллманнинг сўзларига кўра, муҳожирлар асосан кемада Африка мамлакатларига ўтиб кетмоқда.

ХМТ маълумотларига кўра, Жибутига Ямандан 8,9 минг муҳожир етиб келган, булардан 50 фоиз (4,7 минг киши)дан ортиғи учинчи мамлакатлар фуқаролари ҳисобланади. Сомалидаги муҳожирлар сони 3410 кишини ташкил қилади.

26 март куни Ямандаги «Ансор Аллоҳ» исёнчи шиаларига қарши бошланган «Жасорат бўрони» ҳарбий операцияси 21 апрелда якунлангани эълон қилинганди. Араб коалициясига Саудия Арабистони бошчилик қилди. Операцияда Кувайт, Қатар, БАА, Баҳрайн, Миср, Иордания, Марокаш ва Судан иштирок этди. Операция якунлангани эълон қилинганига қарамай, коалиция хусийларнинг позицияларига зарба беришда давом этмоқда, натижада тинч аҳоли бундан зиён кўрмоқда.

Бутунжаҳон соғлиқни сақлаш ташкилоти маълумотларига кўра, апрель ойи охиригача Яманда 1244 киши ҳалок бўлди ва 5044 киши яраланди. 334 мингдан ортиқ киши эвакуация қилинди, 254 мингдан ортиқ одам қочоққа айланди.

Эслатиб ўтамиз, Россия Ямандан 369 нафар Ўзбекистон фуқаросини эвакуация қилганди.