Apple ва IBM ўртасида ўтган йили бошланган ҳамкорлик бозорга янги гаджетлар чиқариш билан чекланиб қолмайдиган кўринади. 30 апрель куни Японияда кексаларга 5 миллион дона iPad бепул совға қилинди, деб хабар беради «Mail.ru».
Хайрия лойиҳасининг мақсади – нафақахўрлар ҳаётини яхшилашга қаратилган.
Apple ва IBM томонидан совға қилинган ҳар бир планшетда махсус ишлаб чиқилган дастур бор. Илова орқали дори қабул қилиш, бадантарбия билан шуғулланиш, парҳезли овқат тайёрлашни унутмаслик каби эслатмаларни яратиш мумкин. Дастур дўконлардан маҳсулот харид қилишни ва уй хўжалигида ёрдам бериш хизматини чақиришни енгиллаштиради. Бундан ташқари ҳар доим қариндош ва яқинлар билан алоқада бўлиб туриш учун ижтимоий тармоқларда мулоқот бошлаш имкониятини беради. Кўриш ва эшитиш қобилияти паст кишилар учун планшетнинг алоҳида созламалари бор.
iPad’нинг айнан қайси авлоди япониялик нафақахўрларга тақдим этилганини Apple маълум қилмади. Лекин юқорида санаб ўтилган функциялар учун планшетнинг энг янги версияси шарт эмас. Япониянинг почта хизмати ҳам ушбу акцияга қўшилди, шу сабабли iPad’ларни етказиб бериш учун компания пул сарфлаб ўтирмади.
Apple маълумотларига кўра, Японияда тахминан 33 миллион кекса одам яшайди, улар мамлакат аҳолисининг деярли тўртдан бирини ташкил қилади. Кейинги 40 йил ичида бу кўрсаткич 40 фоизга ўсиши кутилмоқда, шу туфайли қарияларга бепул планшетларни тақдим қилиш Японияда муҳим масала ҳисобланади.
Изоҳ (0)