Миссионерлик ва ақидапарастлик жиноий жавобгарликка сабаб бўладиган жиноятлардир. Ўзбекистон Жиноят кодексига мувофиқ, ушбу қонунга зид ҳаракатларни амалга оширганлик учун баъзи ҳолатларда вояга етмаганлар ҳам жавобгарликка тортилиши мумкин.
12news.uz’нинг хабар беришича, бу ҳақда Республика Маънавият тарғибот маркази бўлим бошлиғи Гулчеҳра Маткаримова Нурота ижтимоий иқтисодий коллежи ўқувчилари билан учрашувда айтиб ўтган.
«Ўғил ва қизларнинг ахлоқ даражаси ва руҳий чидамлилиги қанчалик юқори бўлса, уларнинг аксарият ҳолларда ақидапарастлар билан алоқадор бўлган турли миссионерлик ташкилотлари вакиллари томонидан «оғдирилиши» эҳтимоли ҳам шунчалик паст бўлади. Ўсмирларни шу йўналишда тарбиялаш – таълим муассасалари маънавият ўқитувчиларининг, энг аввало, оиланинг вазифасидир», - деб ҳисоблайди Маткаримова.
Куни кеча Ўзбекистон Бош прокуратурасида «Камолот» ЁИҲ, Олий ва ўрта махсус таълим вазирлиги, Тошкент давлат юридик университети билан ҳамкорликда «Ёшларни ахборот хуружларидан ҳимоя қилиш масалалари» мавзусида илмий-амалий анжуман бўлиб ўтди.
Конференцияда ёшларни маънавий таҳдид ва ахборот хуружларидан ҳимоя қилиш, «оммавий маданият», Интернет тармоғи ва ОАВнинг миллий менталитетга ёт бўлган салбий таъсирларини бартараф этишнинг ҳуқуқий, ташкилий-техникавий ва иқтисодий услубларини комплекс татбиқ этиш масалалари муҳокама қилинди.
Изоҳ (0)