«Ўзбекэнерго» давлат-акциядорлик компанияси 2016-2018 йилларда Сирдарё вилояти қуввати 900 мегаваттга тенг янги иссиқлик электр станциясини қуришни режалаштирмоқда. Лойиҳаси 2015 йилда ишлаб чиқилиши бошланган станция ҳар бирининг қуввати 450 мегаваттга тенг бўлган иккита буғ-газ қурилмасини ўз ичига олади, дея хабар бермоқда «Gazeta.uz».
Лойиҳанинг дастлабки қиймати 910 миллион долларга тенг бўлиб, унинг 500 миллион долларини хорижий қарз маблағлар ташкил этади. Янги ИЭС қурилиши «Ўзбекэнерго»нинг 2015-2019 йилларга мўлжалланган мамлакат электр энергетика соҳасини ривожлантириш стратегияси доирасида амалга оширилади.
Ҳозирги вақтда вилоятда Марказий Осиёдаги энг йирик – Сирдарё иссиқлик электр станцияси фаолият кўрсатмоқда. У 1981 йилда ишга туширилган бўлиб, ҳар бирининг қуввати 300 мегаваттга тенг бўлган 10та энергоблокдан иборат (умумий қуввати – 3000 мегаватт). Станция ҳар йили республиканинг ягона энергетика тизимига 13 миллиард киловатт-соат ёки Ўзбекистонда ишлаб чиқарилаётган электр энергиянинг 32 фоизини беради.
2014 йил декабрида Россиянинг «Силовие машини» компанияси Сирдарё ИЭСни модернизация қилишни якунлади. Лойиҳа доирасида ҳар бирининг қуввати 300 мегаватт бўлган иккита энергоблок реконструкция қилинди, натижада станция қуввати 50 мегаваттга ошди. Умумий қиймати 60,2 миллион доллар бўлган ушбу лойиҳа Ўзбекистон Тикланиш ва тараққиёт жамғармасининг кредити ва «Ўзбекэнерго»нинг ўз маблағлари ҳисобидан молиялаштирилди.
«Ўзбекэнерго» 2013 йил августида умумий қиймати 1,1 миллиард долларга тенг бўлган Наманган вилоятидаги Тўрақўрғон ИЭСда умумиий қурилиш ишларини бошлаган эди. Умумий қуввати 900 мегаваттга тенг ва йилига 7 миллиард киловатт-соат электр энергия станция 2017 йилда тўлиқ қуриб битказилиши керак.
Маълумот учун, ҳозирги вақтда Ўзбекистон энерготизимида умумий қуввати 12,4 минг мегаватт бўлган 45та электрстанция ишлаб турибди. Мамлакатдаги станцияларнинг электр энергия ишлаб чиқариш салоҳияти бир йилда 56-57 миллиард киловатт-соатни ташкил этади.
Изоҳ (0)