Тошкентдаги «Кинопром» кинокомпаниясининг суратга олиш павилонида 28 апрель куни кино, спорт ва шоу-бизнес юлдузлари йиғилишди. Бу ҳақда PR.uz хабар бермоқда.
Улар орасида Лола Йўлдошева, Темур Кападзе, Муҳаммадисо Абулхаиров, Лола Аҳмедова, Мадина Мумтоз, Шодия Тўхтаева, Дилноза Кубаева, Машҳура Эргашева, Нигина Анорбоева, Доно Бобохонова, Замира Бешимова, Акбар Расулов, «Тантана» болалар вокал-рақс гуруҳи кабилар бор эди.
Бундай юлдузлар гуруҳи Ўзбекистон Соғлиқни сақлаш вазирлиги ва ЮНИСЕФнинг «Ўзбекистонда оналик ва болаликни муҳофаза қилиш хизматларини такомиллаштириш» дастури доирасидаги ижтимоий реклама роликларини суратга олиш ишларида қатнашди.
Соғлом турмуш тарзи, оналик ва болалик муҳофазаси, боланинг эрта ривожлантириш, гигиена, кўкрак сути билан озиқлантириш ва бошқаларнинг тарғиботига бағишланган ушбу лойиҳада барча юлдузлар завқ билан иштирок этишди.
Лойиҳа доирасида суратга олинган реклама роликларининг илк намойиши 1 июнь – Болаларни ҳимоя қилиш халқаро куни бўлиб ўтиши кутилмоқда. Аҳолининг янада кенгроқ қатламларини қамраб олиш мақсадида реклама роликлари қорақалпоқ ва инглиз тилларига ҳам таржима қилинади.
Изоҳ (0)