Тошкент шаҳри аҳолиси учун совуқ сув хизматининг янги тарифлари эълон қилинди

Тошкент шаҳрида 15 майдан совуқ сув таъминоти хизмати учун янгиланган тарифлар жорий этилади. «Газета.uz»нинг «Сувсоз» корхонасига асосланиб хабар беришича, тарифларнинг қимматлашуви электр энергия ва бошқа ресурслар нархининг қимматлашуви билан боғлиқ.

Кўп қаватли турар-жой биноларини сув билан таъминлаш хизмати учун янги тарифлар, тўловлар ҳисоблагичга асосан амалга оширилса – 1 метр куб сув учун жорий 310 сўмдан 342 сўмга (ҳисоблагичсиз уйларда – бир киши учун бир ойга 3814,25 сўмдан 4185,64 сўмга) оширилади.

Хусусий сектордаги уйларнинг эгалари учун ҳисоблагич бўйича 1 метр куб сув нархи, канализация бўлган тақдирда, 246 сўм (ҳозирда – 225 сўм), канализация бўлмаса – 150 сўм (140) этиб белгиланган. Ҳисоблагич бўлмаса, тариф миқдори бир киши учун бир ойга 3798,1 сўм (3490,46), канализацияси бўлмаган уйларда – бир киши учун 335,34 сўмга тенг.

Эслатиб ўтамиз, ҳисоблаш ускуналари бўлмаган ҳолатларда совуқ сув хизмати бўйича тўловлар белгиланган тарифларга ошиб борувчи 1,5 коэффициентни татбиқ этиш билан амалга оширилади.

Тошкент шаҳрида 15 майдан иссиқ сув таъминоти ва иситиш тизими хизмати тарифлари ҳам қимматлашади.