«Самарқанд автомобиль заводи» масъулияти чекланган жамият ходимлари томонидан паст сатҳли ўрта сиғимли автобус модели ихтиро қилинди, дея хабар бермоқда Ўзбекистон Республикаси Интеллектуал мулк агентлиги.
Яратилган фойдали модель йўловчи ташувчи транспорт соҳаси учун мўлжалланган. Унинг вазифаси йўловчиларни ташишда хавфсизликни ошириш, ўтириб кетадиган жойлар сонини кўпайтириш, шунингдек, бекатларда йўловчилар алмашиниш тезлигини оширишдан иборат.
Автобус таркибига унинг олд ва ўрта қисмида жойлашган иккита хизмат эшигига эга бўлган йўловчилар салонидан иборат кузов каркаси, йўловчилар салонидан тўсиқ билан ажратилган ҳайдовчи ўрни, орқа эшик қаршисида жойлашган ҳамда ногиронлар аравачаси учун мўлжалланган жойга эга бўлган майдонча, икки тавақали орқа хизмат эшиги оралиғида жойлашган аппарел, салоннинг орқа девори бўйлаб ва ўнг ва чап ёнбошларида қурилма-подиумда салоннинг олд қисмида ва орқа қисмида қатор жойлашган ўриндиқлар киради.
Бунда қурилма-подиумнинг ўнг ва чап томонлари ўртасида иккитадан зинапоя қилинган. Салоннинг олд қисмида чап ва ўнг ёнбошларда қурилма-подиумлар жойлашган бўлиб, уларда уч қатордан жуфтланган ўриндиқлар жойлаштирилган, биринчи қатордаги жуфтланган ўриндиқлар ғилдираклар устидаги аркада суянчиғи йўналишга қарши ўрнатилган, иккинчи ва учинчи қатордаги ўриндиқлар суянчиғи йўналиш бўйлаб ўрнатилган. Бунда олд қурилма-подиумларнинг бўлмаларида орқа эшикнинг олд тиргагида диагонал йўналишда тировчи поялар ўрнатилган бўлиб, улар кузов поли рамасининг кўндаланг тиргакчаларини кузов каркаси тиргаклари билан бириктиради.
Бундан ташқари, диагонал йўналишдаги тировчи поялар кузов поли рамасининг кўндаланг тиргакчаларига нисбатан а=38° бурчак остида жойлаштирилган. Ёнбош томондан ҳайдовчининг иш жойини йўловчилар салонидан ажратиб турадиган тўсиқ ҳайдовчи иш жойининг энига тенг қилиб бажарилган. Орқа эшикнинг олд тиргаги ортида жойлашган қурилма-подиум бўлмасида эҳтиёт ғилдираги учун жой ажратилган.
Муаллифларга ушбу фойдали модель ихтироси учун № FAP 00996 рақамли патент берилди.
Изоҳ (0)