Польшанинг Шецин шаҳрида ўқ отиш бўйича паралимпиячилар ўртасида ўтказилган жаҳон кубоги баҳсларида Ўзбекистон вакили Server Ибрагимов жаҳон рекордини янгилади. Бу ҳақда Ўзбекистон Миллий ахборот агентлиги хабар бермоқда.
Жаҳон кубоги баҳсларида 40 га яқин давлатдан 300 нафардан зиёд спортчи совринли ўринлар ва 2016 йил Бразилияда ўтказиладиган XV ёзги Паралимпия ўйинларининг йўлланмасини берувчи муҳим рейтинг очколари учун баҳслашди.
Мусобақанинг ўн метр масофадан тўппончада ўқ отиш бўйича ўтказилган баҳсларида Ўзбекистон шарафини ҳимоя қилган Server Ибрагимов саралаш босқичида 578 очко жамғариб, финалга чиқди. Тажрибали спортчи ҳал қилувчи баҳсда 198,9 очко жамғариб, олтин медални қўлга киритди. Унинг натижаси жаҳоннинг янги рекорди сифатида қайд этилди.
Ўзбекистонлик спортчи жаҳон кубогида кўрсатган натижаси билан дунё рейтингида биринчи ўрин эгаллади ва 2016 йил Бразилияда ўтказиладиган Паралимпия ўйинларининг йўлланмасини ҳам нақд қилиб қўйди.
«Паралимпия ўйинлари йўлланмаларини қўлга киритган спортчиларимиз 19 нафарга етди, – деди Ўзбекистон Миллий паралимпия ассоциацияси бош котиби Омон Ғафуров. – Паралимпиячиларимизни олдинда яна кўплаб халқаро мусобақалар кутмоқда. Умид қиламизки, спортчиларимиз бу мусобақаларда ҳам муваффақиятли иштирок этиб, йўлланмаларимиз сонини янада кўпайтиради».
Изоҳ (0)