Қозоғистоннинг Олма-Ота шаҳрида ўтказилган Осиё бокс конфедерациясининг Бош Ассамблеясида 2015 йилнинг 7—14 июнь кунлари ўсмирлар ўртасида бўлиб ўтадиган Осиё чемпионати баҳслари Тошкент шаҳрида ўтказилиши эълон қилинди. Бу ҳақда, Осиё бокс конфедерациясининг расмий сайтида (www.asiaboxing.org) ҳам расман маълумот берилган, деб ёзади Ўзбекистон Миллий олимпия қўмитаси матбуот маркази.
Шу ўринда таъкидлаш жоизки, бокс бўйича қитъа чемпионати баҳслари икки бор Ўзбекистонда ўтказилган. 1995 йили бўлиб ўтган Осиё чемпионатида 1996 йили Атланта (АҚШ)да ўтказилган Олимпиада ўйинларининг йўлланмалари ўйналган бўлса, 1999 йили ўтказилган қитъа чемпионатида 2000 йилги Сидней (Австралия)да бўлиб ўтган Олимпиада ўйинларининг лицензиялари ўйналган.
Жорий йил Тошкент шаҳрида ташкил этиладиган ўсмирлар ўртасидаги Осиё чемпионатида 1999—2000 йилларда таваллуд топган спортчилар ғолиблик учун баҳсларга киришади. Ушбу ёш тоифасида Ўзбекистон, Хитой Тайпейи, Ҳиндистон, Иордания, Қозоғистон, Мўғулистон ва Қирғизистон давлатларида ўсмирлар ўртасида миллий биринчиликлар ўтказилиб, Осиё чемпионатида иштирок этадиган спортчилар саралаб олинган.
Айни пайтда мазкур қитъа чемпионатида Ватанимиз шарафини ҳимоя қиладиган Роримиша Профсор, Асадбек Авазов (-48 кг), Билолбек Мирзараҳимов (-54 кг), Дилшод Рузметов (-66 кг), Қосимхон Қосимов (-75 кг) ва Аббосхон Мирзаабдуллаев (-80 кг) каби иқтидорли спортчиларимиз бўлажак нуфузли мусобақага қизғин ҳозирлик кўрмоқда ва терма жамоамиз мураббийларининг улардан умидлари катта.
Изоҳ (0)