Германия канцлери Ангела Меркелнинг маълум қилишича, жорий сиёсий тушунмовчиликларга қарамай, Германия Россия билан мавжуд иқтисодий ҳамкорликни тўхтатишни хоҳламайди. Бу ҳақда «Корреспондент.net» хабар бермоқда.
Ангела Меркелнинг қайд этишича, ҳозирги вақтда икки мамлакатда ҳам сиёсий муаммолар кузатилаётган бўлиб, уларни сиёсий мулоқотлар воситасида ҳал қилмоқ керак.
«Биз истиқболда йирик, хусусан, Россияни ҳам қамраб оладиган эркин савдо ҳудуди ташкил этилишини кўрмоқдамиз», - деди Меркель Штралзундда бўлиб ўтган иқтисодий форумда.
Германия ҳукумати раҳбарининг таъкидлашича, Украина ва Молдова билан имзоланган Европа Иттифоқи билан уюшиш тўғрисидаги шартномалар Россияга қарши қаратилган эмас.
«Биз, Владимир Путин бир вақтлар айтганидек – Владивостокдан Лиссабонга қадар бўлган умумий иқтисодий маконга яқинлашиш учун қадамба-қадам одимлаяпмиз», - дея қўшимча қилди у.
Бунинг учун, Меркелнинг фикрича, маълум бир қийинчиликлар юзага келган тақдирда ҳам, аввало Украинадаги вазиятни барқарорлаштириш бўйича Минск келишувлари талабларини бажариш керак.
Изоҳ (0)