Кредиторлар Украинанинг қарзларидан кечмоқчи эмас

Украина облигацияларининг беш нафар энг йирик эгалари айни пайтда қарзни камайтиришни назарда тутмайдиган реструктуризация режасини ишлаб чиқмоқда, дея хабар берди «Корреспондент.net». Ушбу акциядорлар мамлакатга 10 миллиард доллар кредит тақдим этган эди.

Бу орада Украина ҳукумати кредит тақдим этиш шартларини ўзгартиришга уринмоқда. Қарзни реструктуризация қилиш қўмитаси муаммони ҳал қилишнинг бошқа йўлини таклиф этиб, «Украинани зарур молиявий қувватлилик билан таъминлаш» имконини берувчи режани ишлаб чиқмоқда.

«Албатта, кредиторлар Украина ҳукумати билан қарзнинг ўзини кўп камайтирмасдан битим тузишга ҳаракат қилади, бироқ улар бунга эришиши амри маҳол. Украинанинг ташқи қарзи ялпи ички маҳсулотга нисбатан шундоқ ҳам тебраниб турибди, иқтисодий кўрсаткичлар эса тушиб бормоқда», — деди Rogge Global Partners PLC компанияси ривожланаётган бозорлар департаменти раҳбари.

Нашрнинг эслатишича, Украина Халқаро валюта фондидан навбатдаги траншни қабул қилиш учун кредиторлар билан май охиригача битим тузиши керак.