Жанубий кореялик активист Ли Мин-бок Шимолий Кореяга Американинг КХДР етакчиси Ким Чен Ин устидан кулувчи «Интервью» фильми ёзилган минглаб дискларни юборганини маълум қилди, деб ёзади Agence France-Presse.
Активист КХДРда тақиқланган фильм ёзилган дискларни ҳаво шарларига боғлаб, чегара яқинида осмонга учирган. Кореяликнинг сўзларига кўра, у бундай акцияларни бир неча маротаба ўтказган.
Аслида КХДРдан қочиб ўтган Ли Мин-бок фикрича, «Интервью» фильми «Ким Чен Инни худо эмас, одам сифатида кўрсатади». Бу фильмларни ҳаво шарида юбориш орқали, у Шимолий Корея аҳолисига ҳақиқатни англатмоқчи эканлигини таъкидлади.
Эслатиб ўтамиз, «Интервью» деб номланган ушбу фильм сюжетида АҚШ телевидениесида ишлайдиган икки мухбир Ким Чен Индан интервью олиш имконига эга бўлади. Улар Шимолий Кореяга кетиш сафаридан аввал махфий хизмат томонидан КХДР раҳбарини ўлдириш ҳақида буйруқ олади. Фильмдаги бош ролларда Жеймс Франко («Ўргимчак одам») ва Сет Роген иштирок этган.
«Интервью» 25 декабрь, Рождество кунидан АҚШ ҳудудидаги 200 дан ортиқ мустақил кинотеатрларда намойиш этила бошлади. Бундай қарорни кинолентани ишлаб чиқарган Sony Pictures компанияси қабул қилди.
Дастлаб фильмни АҚШдаги 3 мингта кинотеатрда кўрсатиш режалаштирилган эди. Sony Pictures компанияси компьютер тармоғига ҳужум уюштирган хакерлар «Интервью» премьераси бўладиган кинотеатрларда 2001 йил 11 сентябрдаги каби терактлар уюштириш билан таҳдид этгач, фильмнинг 25 декабрга мўлжалланган АҚШ премьераси бекор қилинган эди.
Изоҳ (0)