Royal Dutch Shell Британиянинг BG Group нефть-газ компаниясини 70 миллиард долларга сотиб олишни режалаштирмоқда. Ушбу келишув нефть-газ бозорида сўнгги ўн йилда кузатилган энг катта бирлашувга айланади, дея хабар бермоқда Meduza.
Бундан ташқари, BG Group акциядорлари умумий ҳисобда бирлашган компаниянинг 19 фоиз акцияларини қўлга киритишади.
Shell’нинг маълум қилишича, BG Group’ни сотиб олиш билан бирлашган компаниянинг шу вақтгача топилган нефть ва газ захиралари чорак баробар кўпаяди. Дастлабки маълумотларга кўра, икки компаниянинг бирлашувидан чиққан синергетик самара 2018 йилда 2,5 миллиард долларни ташкил этади.
BG Group – газ ишлаб чиқариш бўйича Буюк Британиянинг энг йирик учинчи компаниясидир. 7 апрель маълумотларига кўра, BG Group’нинг бозор нархи (капитализацияси) 45 миллиард долларга тенг эди. Shell билан эришилган келишув ҳақидаги хабарлардан сўнг Лондон фонд биржасида BG Group акциялари нархи 37 фоизга ошди.
Shell – жаҳондаги энг йирик компаниялардан бири. Унинг бозор капитализацияси 202 миллиард долларга тенг. Ушбу кўрсаткич бўйича нефть-газ компаниялари орасида фақат Exxon (360 миллиард доллар) компаниясигина Shell’ни ортда қолдиради.
Изоҳ (0)