Греция Брюсселдан мустақил равишда сиёсат юритишга уринишда давом этмоқда. Ва бу «мустақиллик» уни Кремлгача олиб келди: бугун бош вазир Алексис Ципрас Россияга тўрт кунлик ташриф билан Грецияга кўрсатиладган ёрдам масаласини муҳокама қилиш учун етиб келади. Бу ҳақда «Сегодня.ua» хабар берди.
«Коммерсант» газетасининг Россия ҳукуматидаги манбасига таяниб берган маълумотига кўра, мулоқот мавзуси кредитлар, 2016 йилдан бошлаб газ нархига бериладиган чегирма ва «ол ёки тўла» шартларининг енгиллашуви бўлиши кутилмоқда.
2014 йилда газ нархи 15 фоизга туширилган эди, 2015 йилнинг иккинчи ярим йиллигида эса Греция учун газ нархи 300 доллар қилиб белгилаб қўйилади.
«Биз Греция учун янги кредитлар ажратиш имкониятлари борасида музокараларга тайёрмиз. Шу билан биргаликда Россия томони ҳам ўз навбатида Грецияда активларга эгалик қилиш масалаларига нисбатан қизиқиш билдирмоқда», – дея маълум қилди нашр суҳбатдоши.
Бугун кўпчилик мулоқотдан қочаётган Путин билан учрашувга отланган Греция ҳукумати Берлин билан тамомила низо ҳолатига кирди: Греция молия вазирлиги Иккинчи жаҳон уруши даврида фашистлар Германияси томонидан етказилган зарар учун тўланиши лозим бўлган товон пули миқдорини ҳисоблаб чиқди. Унга кўра, Германия Грецияга 278,7 миллиард евро тўлаши керак. Шу билан бирга, Грециянинг халқаро кредиторлар учлигидан 110 миллиард евро қарздорлиги маълум.
Изоҳ (0)