Оиласи АҚШга 10 йил олдин Нигериядан кўчиб келган ўсмир Гарольд Эки АҚШдаги энг нуфузли университетларнинг саккизтасига ўқишга кирди, дея хабар бермоқда The Daily Mail. 18 ёшли йигит ҳужжатларини топширган 13 та ўқув юртининг барчасига қабул қилинган (уларнинг орасида мамлакатнинг 8 та энг обрўли ОТМлари ҳам бор).
Эки 2005 йил 8 ёшида ота-онаси билан Нью-Йоркка кўчиб келган. Йигитнинг айтишича, у ота-онасига ёрдам бериш ва уларнинг ишончини оқлаш учун яхши ўқиган.
Эки келажакда нейрохирург бўлишни ва Альцгеймер хасталиги билан оғриган бувисини даволаш учун дори яратишни режалаштираётганини айтган. Эки ҳозирча бирорта ўқув юртини танламаган, бироқ Йель университетига хоҳиш билдираётганлигини маълум қилган.
Гарольд мактаб газетасида муҳаррир сифатида ишлаган. Унинг айтишича, берилган ҳар қандай имкониятдан фойдаланишга доимо ҳаракат қилган. «Кўчиб келганимизда мен инглиз тилида жуда ёмон гапирардим, лекин хатоимни тўғрилаш учун барча имкониятимни ишга солдим», – дейди Эки. Йигитча мактабда АҚШ тарихи у учун энг қийин фан бўлганини эсга олди.
Гарольднинг тўрт укаси бор. Экининг сўзларига кўра укалари унинг университетга кириш рекордини янгилашга тайёрланмоқда.
АҚШнинг «Чирмовуқлар лигаси» ассоциациясига Колумбия, Браун, Гарвард, Дартмут, Йель, Корнелл, Пенсильвания ҳамда Принстон университетлари киради. Ушбу ОТМлар ҳар доим мамлакатнинг 15 та энг яхши ўқув юртлари рейтингига киритилади.
Изоҳ (0)